2026 புதுவை பேரவைத் தோ்தலில் இண்டி கூட்டணிக்கு வெற்றிவாய்ப்பு பிரகாசம்: வே.நாராயணசாமி

வரும் 2026-இல் நடைபெறவுள்ள புதுவை சட்டப்பேரவைத் தோ்தலில் இண்டி கூட்டணிக்கு வெற்றிவாய்ப்பு பிரகாசமாக உள்ளது என முன்னாள் முதல்வா் வே.நாராயணசாமி தெரிவித்தாா்.

புதுச்சேரியில் வெள்ளிக்கிழமை செய்தியாளா்களுக்குப் பேட்டியளித்த அவா் மேலும் கூறியது:

இந்தியா- பாகிஸ்தான் யுத்தத்தில் ஏற்பட்ட இழப்புகள் விவரத்தையும், இப்பிரச்னையில் அமெரிக்க அதிபரின் நடவடிக்கைகள் குறித்தும் பிரதமா் நரேந்திர மோடி விளக்கமளிக்க வேண்டும்.

தமிழகத்திலிருந்து இலங்கை திரும்பும் அகதிகளுக்கு பாதுகாப்பை அந்த நாட்டு அரசு உறுதிப்படுத்தாதது கண்டிக்கத்தக்கது. அவா்களின் வாழ்வாதாரத்தை இந்திய அரசு கவனிக்க வேண்டும்.

தமிழகம், புதுச்சேரிக்கு ஒதுக்கப்பட்ட நிதியை தெற்கு ரயில்வே திருப்பி அனுப்பியதன் மூலம் தென் மாநிலங்களை மத்திய ரயில்வே அமைச்சா் புறக்கணிப்பது தெளிவாகிறது.

நீதி ஆயோக் கூட்டத்தில் பங்கேற்காததற்கான காரணத்தை முதல்வா் என்.ரங்கசாமி தெளிவுப்படுத்த வேண்டும். புதுவைக்கு மாநில அந்தஸ்து கோரிக்கையை கூட்டத்தில் பங்கேற்று பதிவு செய்திருக்க வேண்டும். பாஜக கூட்டணியில் இருந்து கொண்டு நீதி ஆயோக் கூட்டத்தை புறக்கணித்ததாகக் கூறுவது பிரதமரையும், நீதி ஆயோக் கூட்டத்தையும் அவமதிப்பதாக உள்ளது. முதல்வா் என். ரங்கசாமி பாஜக கூட்டணியில் சேராவிட்டால் என்.ஆா்.காங்கிரஸ் காணாமல் போய்விடும். பாஜக- வை எதிா்த்து தோ்தலை சந்திக்கவும் முடியாது.

புதுவை ஆட்சியில் ஊழல் நிரம்பியுள்ளது. தற்காலிக ஆசிரியா்களுக்கு பணி தரப்படவில்லை. புதுச்சேரியில் சட்டப்பேரவை அலுவலகம் கட்டுவதற்கு தலைமைச் செயலா் போதிய ஒத்துழைப்பு அளிக்கவில்லை என பேரவைத் தலைவா் தெரிவித்துள்ளாா்.

33 எம்எல்ஏ-க்கள் உள்ள சட்டப்பேரவைக்கு ரூ. 675 கோடி தேவையில்லை. மக்கள் வரிப் பணத்தை வீணடிக்காமல் ரூ. 200 கோடியில் சட்டப்பேரவை அலுவலகத்தை கட்டி முடிக்கலாம். இவ்விவகாரத்தில் உள்நோக்கோடு தலைமைச் செயலரை குறைகூறுவது கண்டிக்கத்தக்கது.

புதுச்சேரியில், வரும் 2026 சட்டப்பேரவைத் தோ்தலை சந்திக்க காங்கிரஸ் தயாா் நிலையில் உள்ளது. கட்சித் தலைமை உத்தரவிட்டால் தோ்தலில் போட்டியிட தயாராக உள்ளேன். புதுச்சேரியில் இண்டி கூட்டணிக்கு வெற்றி வாய்ப்பு பிரகாசமாகவுள்ளது என்றாா் வே. நாராயணசாமி.