Bigg Boss Tamil 8: `கைவிடப்பட்ட 50வது நாள் ட்விஸ்ட்' - வாய்ப்பைக் கெடுத்துக் கொண்டாரா அர்னவ்?

விஜய் டிவியில் அக்டோபர் முதல் வாரத்தில் தொடங்கிய பிக்பாஸ் சீசன் 8 சரியாக 50வது நாளைத் தொட்டுள்ளது.

ரவீந்தர், ரஞ்சித், அர்னவ் உள்ளிட்ட பதினெட்டு போட்டியாளர்களூடன் தொடங்கிய நிகழ்ச்சியில் இதுவரை தர்ஷா குப்தா, ரவீந்தர், சுனிதா, அர்னவ் உள்ளிட்டோர் எலிமினேட் ஆகி வெளியேறியுள்ளனர்.

மேலும் நிகழ்ச்சி தொடங்கிய சில தினங்களில் வைல்டு கார்டு என்ட்ரி மூலம் மஞ்சரி, ராயன் முதலான ஆறு பேர் சில தினங்களுக்கு முன் நிகழ்ச்சிக்குள் சென்றனர். இந்த ஆறு பேரில் ஒருவரான வர்ஷினி வெங்கட் கடந்த வாரம் எவிக்ட் ஆகி வெளியேறினார்.

இந்நிலையில் நிகழ்ச்சி தொடங்கிய 50வது நாளையொட்டி இன்னொரு வைல்டு கார்டு என்ட்ரியும் இருக்கலாமென்றும், நிகழ்ச்சியிலிருந்து ஆரம்பத்தில் வெளியேறிய அர்னவுக்கு அந்த வாய்ப்பு செல்லக்கூடுமெனவும் கூறப்பட்டது. அர்னவ் என்ட்ரி இந்த வாரத்தில் இருக்கலாமென நாமும் செய்தி வெளியிட்டிருந்தோம். ஆனால், அதில்தான் மிகப்பெரிய ட்விஸ்ட் நடத்திருக்கிறது.

நேற்றுடன் பிக்பாஸ் தொடங்கி 50 நாள் ஆகிவிட்ட நிலையில் தற்போது வரை இரண்டாவது வைல்டு கார்டு என்ட்ரிக்கான எவ்வித அறிகுறியும் தென்படவில்லை.

என்ன நடந்தது என நிகழ்ச்சி தொடர்புடைய சிலரிடம் பேசினோம்.

’’நிகழ்ச்சிக்குள் போகிறப்பவே ஃபைனல் வரைக்கும் இருப்பேன்னு சொல்லிட்டுப் போயிருக்கார் அர்னவ். ஆனா அங்க போனதுல இருந்து பெரிசா கன்டென்ட் தரல. இதனால்தான் எவிக்ட் ஆகியிருக்கார். ஆனா தன்னை எவிக்ட் செய்ததுல பெரிய அதிருப்தி அவருக்கு. எவிக்ட் ஆன அன்னைக்கு வெளியில வந்து அழுதிருக்கார். தவிர சேனல் மீது கோபப்பட்டதாச் சொல்றாங்க.

தவிர எவிக்ட் ஆகி வெளியேறி வர்றப்ப விஜய் சேதுபதியும் அவர் பங்குக்கு சில அட்வைஸ்களை பண்ணிவிட்டதுல மனுஷன் ரொம்பவே அப்செட். தனக்கிருக்கிற சில தொடர்புகள் மூலமா ‘ரொம்ப எதிர்பார்ப்போட போனேன். சட்டுன்னு அனுப்பிட்டீங்க. இதை நான் சுத்தமா எதிர்பார்க்கலை. இப்படித் தெரிஞ்சிருந்தா நிகழ்ச்சிக்க்கு வந்திருக்கவே மாட்டேன்’ங்கிற ரீதியில் சேனல் தரப்புகிட்ட புலம்பியிருக்கார்.

அதனால அங்கிருந்தும், ‘ரீ என்ட்ரி மாதிரி ஏதாவது வாய்ப்பிருந்தா பார்க்கலாம்’னு சும்மா பேச்சுக்குச் சொல்லி வச்சிருக்காங்க.

இப்படியான சூழலல்தான் நிகழ்ச்சியின் 50வது நாள் வந்தது.

50-வது நாள்ல ஏதாவது ட்விஸ்ட் வைக்கலாம்னு தயாரிப்பு தரப்புல முதல்ல யோசிச்சது நிஜம்தான். இதைத் தெரிஞ்சுகிட்ட அர்னவ் அன்னைக்கு ஒரு வைல்டு கார்டு என்ட்ரி இருக்கும்னும் அப்ப தன்னோட ரீ என்ட்ரி இருக்கலாம்னு சோஷியல் மீடியாவுல ஒரு பதிவைப் போட, கடைசியில அதுவே அவருக்கு வினையாகியிருக்கு.

பொதுவா பிக் பாஸுக்கு செலக்ட் ஆகிறவங்ககிட்ட அது தொடர்பான தகவலை பரம ரகசியமா வச்சிருக்கணும்னு ஸ்ட்ரிக்டா சொல்லியிருப்பாங்க.

அது தெரிஞ்சுமே இவர் சோஷியல் மீடியாவுல இப்படி பதிவிட்டதுனால சேனல்ல இவர் மேல ரொம்பவே கடுப்பாகிட்டாங்க.

அந்தக் கடுப்புலதான் இரண்டாவது வைல்டு கார்டு என்ட்ரி பத்தி எதுவும் கண்டுக்கலைன்னு தெரிய வருது’’ என்றனர் அவர்கள்.

இந்த சீசனில் தொடக்க நாளில் நிகழ்ச்சிக்குள் சென்ற சாச்சனாவுக்கு ஒரே வாரத்தில் ரீ என்ட்ரி வாய்ப்பு தரப்பட்டது. அதே போன்றதொரு வாய்ப்பு தனக்கும் அமையும் என பெரிய நம்பிக்கையிலிருந்தாராம் அர்னவ். ஆனால் அது நடக்கவில்லை.

இந்த இடத்தில் நிகழ்ச்சிக்கு அறிமுகமான போது அவரிடம் விஜய் சேதுபதி ‘உங்களுக்கு ஏதாவது நல்லது நடக்குதுன்னு வச்சுக்கோங்க, வாயைத் திறந்து அதைக் கெடுத்திடாதீங்க’ எனச் சொன்னதையே நினைக்க வேண்டியிருக்கிறது.