Doctor Vikatan: மச்சம் என்பது திடீரென வருமா... திடீரென வரும் மச்சத்தை எப்படிப் புரிந்துகொள்வது?
பதில் சொல்கிறார், சென்னையைச் சேர்ந்த சருமநல மருத்துவர் பூர்ணிமா
மச்சம் என்பது எப்போது வேண்டுமானாலும் வரலாம். திடீரென மச்சம் வந்தால் அதைப் பார்த்து பயப்படத் தேவையில்லை. அதே சமயம், எல்லா மச்சங்களையும் அப்படி அணுக முடியாது.
திடீரென தோன்றும் மச்சம் பலருக்கும் புற்றுநோயின் அறிகுறியாக இருக்குமோ என்ற பயத்தை ஏற்படுத்துவதைப் பார்க்கலாம். மச்சம் குறித்து நீங்கள் எப்போது கவலைப்பட வேண்டும், எச்சரிக்கையாக வேண்டும் என்பதற்கு சில அறிகுறிகள் உள்ளன. உதாரணத்துக்கு, ஒரு மச்சம் திடீரென அளவில் பெரிதாகிக் கொண்டே போகிறது என்றாலோ, ஒரே மாதத்தில் அதன் அளவானது வித்தியாசமான அளவில் பெரிதாகிறது என்றாலோ, அந்த மச்சத்திலிருந்து நீர்க்கசிவு போன்ற ஏதேனும் இருந்தாலோ, மச்சம் இருக்கும் இடம் புண்ணாகிப் போனாலோ அது குறித்து கவனிக்க வேண்டியது அவசியம். உடனே மருத்துவரை அணுக வேண்டும்.
சில மச்சங்களில் ஏற்படும் புண்ணானது, ஆறினாலும், மீண்டும் மீண்டும் வரலாம். அந்தப் பகுதியில் குழி போன்று வரலாம். மச்சத்தைச் சுற்றிய பகுதியானது சீராக இல்லாமலிருக்கலாம். இவையெல்லாம் அந்த மச்சமானது புற்றுநோயாக மாறக்கூடும் என்பதற்கான அறிகுறிகள். எனவே, இந்த அறிகுறிகளை அலட்சியம் செய்யாமல் உடனே மருத்துவ ஆலோசனை பெற வேண்டும். மற்றபடி, இந்த அறிகுறிகள் இல்லாமல் திடீரென தோன்றும் மச்சம் குறித்து பயப்பட வேண்டாம். மச்சம் புதிய இடங்களில் வரலாம். அது சாதாரணமானதுதான்.
உங்கள் கேள்விகளை கமென்ட் பகுதியில் பகிர்ந்து கொள்ளுங்கள்; அதற்கான பதில்கள் தினமும் விகடன் இணையதளத்தில் #DoctorVikatan என்ற பெயரில் வெளியாகும்.
