Karnataka: `அவளுக்குத் தேவை என் மரணம் மட்டும்தான்...' - மனைவியைக் குற்றம்சாட்டி இளைஞர் தற்கொலை

கர்நாடக மாநிலம், சாமுண்டேஸ்வரி நகர்ப் பகுதியில் வசித்தவர் பீட்டர் கொல்லப்பள்ளி. தனியார் நிறுவனத்தில் பணிபுரிந்து வந்தார். இவருக்கு இரண்டு ஆண்டுகளுக்கு முன்பு பிங்கி என்றப் பெண்ணுடன் திருமணம் நடந்திருக்கிறது. ஆனால், திருமணம் முடிந்ததிலிருந்து கணவன் - மனைவிக்குள் தொடர் சண்டைகள் நடந்திருக்கிறது. அதைத் தொடர்ந்து கடந்த சில மாதங்களாக இருவரும் தனித்தனியே பிரிந்து வாழ்ந்து வந்தனர். இந்த நிலையில், பீட்டர் கொல்லப்பள்ளி நேற்று தற்கொலை செய்துகொண்டார். இது தொடர்பாக வழக்குப் பதிவு செய்த காவல்துறை, பீட்டர் வீட்டில் சோதனை நடத்தியது.

அதில், தற்கொலைக் குறிப்பு ஒன்று கிடைத்தது. அதில், ``அப்பா மன்னிக்கவும். என் மனைவி பிங்கி என்னைக் கொடுமைபடுத்துகிறாள். அவளுக்குத் தேவை என் மரணம் மட்டும்தான். அவளின் சித்ரவதையால் தினந்தினம் இறந்துகொண்டிருக்கிறேன். அண்ணா தயவு செய்து நம் பெற்றோரைப் பத்திரமாகப் பார்த்துக்கொள்" எனக் குறிப்பிட்டிருக்கிறார். இது தொடர்பாக செய்தியாளர்களிடம் பேசிய பீட்டரின் சகோதரர் எஷய்யா, ``ஞாயிற்றுக்கிழமை என்பதால் நாங்கள் எல்லோரும் தேவாலயம் சென்றுவிட்டோம். மதியம் வந்து பார்த்தபோதுதான் எங்களுக்கு அதிர்ச்சியாக இருந்தது.

தனியார் நிறுவனத்தில் வேலைபார்த்துவந்த என் சகோதரர் மூன்று மாதங்களுக்கு முன்பு வேலையைக்கூட இழந்துவிட்டார். அவரின் மனைவி விவாகரத்துக்கு விண்ணப்பித்திருந்தார். ஜீவனாம்சமாக ரூ.20 லட்சம் கேட்டிருந்தார். இந்த தற்கொலைக்கு காரணமான பிங்கியை கைது செய்ய வேண்டும். என் சகோதரரின் மரணத்துக்கு நீதி வேண்டும்" எனக் குறிப்பிட்டார். எஷய்யாவின் புகாரின் அடிப்படையில் பிங்கி மீது வழக்குப்பதிவு செய்யப்பட்டு விசாரிக்கப்பட்டு வருகிறது.