Maharashtra: முதல்வர் பதவி விவகாரம்: "பிரதமரின் முடிவை ஏற்பேன்" - சரணடைந்த ஷிண்டே; பாஜக திட்டமென்ன?

மகாராஷ்டிரா சட்டமன்றத் தேர்தலில் பா.ஜ.க கூட்டணி அமோக வெற்றி பெற்றும் ஆட்சியமைப்பதில் தாமதம் ஏற்பட்டுள்ளது. முதல்வர் பதவியை விட்டுக்கொடுக்க ஏக்நாத் ஷிண்டே தயக்கம் காட்டி வருகிறார். தற்போது தனது நிலையிலிருந்து ஏக்நாத் ஷிண்டே இறங்கி வந்துவிட்டதாகச் செய்திகள் கூறுகின்றன.

ஆட்சியமைப்பதற்கான வேலையில் பா.ஜ.க ஈடுபட்டுள்ளது. தேவேந்திர பட்னாவிஸ் முதல்வராகப் பதவியேற்க இருக்கிறார். இப்போது எந்த கட்சிக்கு எத்தனை அமைச்சர் பதவி, எந்தெந்த இலாகா என்பது குறித்து பேச்சுவார்த்தை நடந்து வருகிறது. ஏக்நாத் ஷிண்டே தனது நிலைப்பாட்டிலிருந்து இறங்கி வந்துவிட்டார் என்பதை நிரூபிக்கும் விதமாக அவரது பேச்சு அமைந்திருக்கிறது.

இது தொடர்பாக ஏக்நாத் ஷிண்டே நிருபர்களுக்கு அளித்த பேட்டியில், "முதல்வர் பதவி விவகாரத்தில் நான் தடையாக இருக்கமாட்டேன் என்று பிரதமரிடம், அமித் ஷாவிடமும் தெரிவித்துவிட்டேன். இவ்விவகாரத்தில் முடிவு எடுக்கும் அதிகாரத்தைப் பிரதமரிடம் விட்டுவிட்டேன். பா.ஜ.க என்ன முடிவு எடுத்தாலும், அதனை ஏற்றுக்கொள்வோம். தடைக்கல்லாக இருக்கமாட்டேன். நான் சாதாரண மனிதன். முதல்வரானதிலிருந்து ஒரு நாள் கூட விடுமுறை எடுத்துக்கொண்டதில்லை. நான் அழக்கூடியவன் கிடையாது. போராடக்கூடியவன். எனது இறுதி மூச்சுவரை மகாராஷ்டிராவிற்காகப் பாடுபடுவேன்'' என்று குறிப்பிட்டார். தானேயில் உள்ள தனது வீட்டில் ஏக்நாத் ஷிண்டே பேட்டியளித்தார்.

ஏக்நாத் ஷிண்டே தனது நிலையிலிருந்து இறங்கி வந்திருப்பதால் ஓரிரு நாளில் புதிய அரசு பதவியேற்கும் என்று கூறப்படுகிறது. வரும் 2ஆம் தேதி புதிய அரசு பதவியேற்கலாம் என்று பா.ஜ.க வட்டாரங்கள் தெரிவித்தன.

ஏக்நாத் ஷிண்டே தலைமையிலான சிவசேனா தலைவர்கள் பீகார் மாடலை பின்பற்றி ஏக்நாத் ஷிண்டேயிக்கு மீண்டும் முதல்வர் பதவி கொடுக்க வேண்டும் என்று கூறி வந்தனர். அதோடு ஏக்நாத் ஷிண்டேயிக்கு முதல்வர் பதவி கொடுக்க வேண்டும் என்று கோரி, ஏக்நாத் ஷிண்டே வீட்டின் முன்பு சிவசேனா தொண்டர்கள் கூடினர். அவர்களிடம் தனது வீட்டு முன்பு திரள வேண்டாம் என்று ஷிண்டே கேட்டுக்கொண்டார்.

இது குறித்து சிவசேனா தலைவர் ஒருவர் கூறுகையில், ''அஜித்பவாரின் தேசியவாத காங்கிரஸ் கட்சியால் நாங்கள் பா.ஜ.கவிடம் அதிக கறாராகப் பேசமுடியாமல் போய்விட்டது. அஜித்பவார் கட்சி இந்த அளவுக்கு வெற்றி பெறாமல் போய் இருந்தால் எங்களது கை ஓங்கி இருக்கும்" என்று தெரிவித்தார்.

நீங்கள் விரும்பி படித்த தொடர்கள், இப்போது ஆடியோ வடிவில்... புத்தம் புதிய விகடன் ப்ளே... உங்கள் அன்றாட பணிகளை கவனித்துக் கொண்டே ரசித்து கேட்க, உடனே இன்ஸ்டால் செய்யுங்கள்...

https://bit.ly/VaigainathiNaagarigam