Sunita Williams: 9 மாதங்களுக்கு பிறகு வெற்றிகரமாக பூமிக்கு திரும்பினார் சுனிதா வில்லியம்ஸ்..

புவியீர்ப்பு விசையைத் தொட்டு பூமியில் கால் பதித்தார் சுனிதா வில்லியம்ஸ்.

சா்வதேச விண்வெளி நிலையத்தில் கடந்த 9 மாதங்களாக (286 நாள்கள்) பயணித்து வரும் நாசா விண்வெளி வீராங்கனையான சுனிதா வில்லியம்ஸ், அமெரிக்க விண்வெளி வீரர் நிக் ஹேக், ரஷ்ய விண்வெளி வீரர் அலெக்சாண்டர் கோர்புனோவ்  உள்ளிட்ட நால்வரை பூமிக்கு அழைத்து வர டிராகன் விண்கலன் கடந்த மார்ச் 16-ம் தேதி அனுப்பப்பட்டது.

இந்திய நேரப்படி நேற்று(மார்ச் 18) காலை 10.35 மணிக்கு சர்வதேச விண்வெளி நிலையத்தில் இருந்து பூமியை நோக்கி சுனிதா வில்லியம்ஸ் உள்ளிட்ட நால்வரும்  தங்களது பயணத்தைத் தொடங்கினர்.

இந்திய நேரப்படி இன்று 'அதிகாலை 3 மணி அளவில்' டிராகன் விண்கலம் பூமியை வந்து சேர்ந்தது. சர்வதேச விண்வெளி மையத்தில் இருந்து டிராகன் விண்கலம் விடுவிக்கப்பட்டு , பூமியை வந்து சேரும் வரை காணொலி காட்சிகளை நாசா நேரடி ஒளிப்பரப்பு செய்திருந்தது. இந்தக் காட்சிகள் தற்போது சமூகவலைதளங்களில் வைரலாகி வருகிறது.

இவர்களுக்குப் பதிலாக, தற்போது ஸ்பேஸ்எக்ஸ் நிறுவனத்தின் க்ரூ-10 விண்கலத்தின் மூலம் சர்வதேச விண்வெளி நிலையத்திற்குச் சென்றுள்ள ரஷ்யா, ஜப்பான் மற்றும் அமெரிக்காவைச் சேர்ந்த 4 விண்வெளி வீரர்கள் அங்கு பணிகளைத் தொடர்வார்கள் என்று கூறப்படுகிறது.

சுனிதா வில்லியம்ஸ் பயண நேரக் குறிப்புகள்

சுனிதா வில்லியம்ஸ் மற்றும் குழுவினர் பூமிக்குத் திரும்புவது தொடர்பாக கால அட்டவனையை நாசா வெளியிட்டுள்ளது. இந்திய நேரப்படி அதன் நேரக் குறிப்புகள் இங்கே...

*மார்ச் 18, காலை 8:15 மணி: சுனிதா வில்லியம்ஸ் உள்ளிட்ட நால்வர் டிராகன் விண்கலத்திற்குள் சென்று, அவரவர் இருக்கையில் அமர்ந்தனர்.

*காலை 10:35 மணி: டிராகன் கலம் சர்வதேச விண்வெளி நிலையத்தை விட்டுப் பிரிந்தது (Undocking) பயணத்தைத் தொடங்கியது.

*மார்ச் 19, அதிகாலை2:41 மணி: டிராகன் கலம் அதன் சுற்றுப்பாதையிலிருந்து வெளியில் வந்து பூமியின் வளிமண்டலத்திற்குள் நுழைந்தது.

*அதிகாலை 3:27 மணி: கலத்தின் வேகம் குறைந்து, பாரசூட்டுகள் விரிக்கப்பட்டு பாதுகாப்பாக பெருங்கடலில் இறங்கியது.

Vikatan WhatsApp Channel

இணைந்திருங்கள் விகடனோடு வாட்ஸ்அப்பிலும்... CLICK BELOW LINK

https://bit.ly/VikatanWAChannel