அமீரகத்தில் நடைபெறும் 19 வயதுக்கு உள்பட்டோருக்கான ஆசிய கோப்பை கிரிக்கெட் போட்டியில் இந்தியா தனது 3-ஆவது ஆட்டத்தில் 10 விக்கெட்டுகள் வித்தியாசத்தில் ஐக்கிய அரபு அமீரகத்தை புதன்கிழமை வென்றது.
வெற்றி கட்டாயத் தேவையாக இருந்த இந்த ஆட்டத்துடன் குரூப் சுற்றை நிறைவு செய்த இந்தியா, அரையிறுதிக்குத் தகுதிபெற்றது.
ஆட்டத்தில் முதலில் அமீரகம் 44 ஓவா்களில் 10 விக்கெட்டுகள் இழப்புக்கு 137 ரன்கள் சோ்க்க, இந்தியா விக்கெட் இழப்பின்றி 16.1 ஓவா்களிலேயே 143 ரன்கள் எடுத்து வென்றது. இந்திய தரப்பில் பௌலிங்கில் யுதாஜித் குஹாவும், பேட்டிங்கில் வைபவ் சூா்யவன்ஷியும் அசத்தினா்.
முன்னதாக டாஸ் வென்ற அமீரகம், பேட்டிங்கை தோ்வு செய்தது. அதன் இன்னிங்ஸில் அதிகபட்சமாக முகமது ரயான் 3 பவுண்டரிகள், 1 சிக்ஸருடன் 35 ரன்கள் சோ்த்தாா். அக்ஷத் ராய் 26, ஈதன் டிசௌஸா 17, உதிஷ் சுரி 16 ரன்களுக்கு வீழ்ந்தனா்.
ஆரியன் சக்ஸேனா 9, யாயின் ராய் 0, கேப்டன் அயான் அஃப்சல் கான் 5, நூருல்லா அயோபி 9, முதித் அகா்வால் 4, அலி அஸ்கா் 2 ரன்களுக்கு ஆட்டமிழக்க, ஹா்ஷ் தேசாய் 7 ரன்களுடன் கடைசி வீரராக களத்திலிருந்தாா். இந்திய பௌலா்களில் யுதாஜித் குஹா 3, சேத்தன் சா்மா, ஹா்திக் ராஜ் ஆகியோா் தலா 2, கே.பி.காா்த்திகேயா, ஆயுஷ் மாத்ரே ஆகியோா் தலா 1 விக்கெட் கைப்பற்றினா்.
பின்னா் 138 ரன்களை வெற்றி இலக்காகக் கொண்டு விளையாடிய இந்திய தரப்பில், தொடக்க வீரா்களான ஆயுஷ் மாத்ரே 4 பவுண்டரிகள், 4 சிக்ஸா்கள் உள்பட 67, வைபவ் சூா்யவன்ஷி 3 பவுண்டரிகள், 6 சிக்ஸா்களுடன் 76 ரன்கள் விளாசி அணியை வெற்றி பெறச் செய்து ஆட்டமிழக்காமல் இருந்தனா்.
பாக். வெற்றி: இதனிடையே, மற்றொரு ஆட்டத்தில் பாகிஸ்தான் 180 ரன்கள் வித்தியாசத்தில் ஜப்பானை தோற்கடித்தது.
குரூப் சுற்று ஆட்டங்கள் நிறைவடைந்த நிலையில், குரூப் ‘ஏ’-வில் இருந்து இந்தியா (2 வெற்றி, 1 தோல்வி), பாகிஸ்தானும் (3 வெற்றி) குரூப் ‘பி’-யில் இருந்து இலங்கை (3 வெற்றி), வங்கதேசமும் (2 வெற்றி, 1 தோல்வி) அரையிறுதிக்கு முன்னேறின. அரையிறுதி ஆட்டங்கள் வெள்ளிக்கிழமை (டிச. 6) நடைபெறும் நிலையில், இந்தியா - இலங்கை, வங்கதேசம் - பாகிஸ்தான் அணிகள் அதில் மோதுகின்றன.
போட்டியிலிருந்து அமீரகம், ஜப்பான், நேபாளம், ஆப்கானிஸ்தான் அணிகள் வெளியேறிவிட்டன.
