அரசு ஐடிஐகளில் மாணவா் சோ்க்கைக்கு அக்.30 வரை காலஅவகாசம் நீட்டிப்பு

அரசு, தனியாா் தொழிற்பயிற்சி நிலையங்களில் (ஐடிஐ) மாணவா்கள் நேரடி சோ்க்கைக்கு வரும் 30-ஆம் தேதி வரை கால அவகாசம் நீட்டிக்கப்பட்டுள்ளது.

இது தொடா்பாக பேட்டை ஐடிஐ தொழிற்பயிற்சி நிலைய துணை இயக்குநரும், முதல்வருமான இரா. கலைச்செல்வி வெளியிட்ட செய்திக் குறிப்பு:

அரசு, தனியாா் தொழிற்பயிற்சி நிலையங்களில் (ஐடிஐ) மாணவா்கள் நேரடி சோ்க்கைக்கு வரும் 30-ஆம் தேதிவரை கால அவகாசம் நீட்டிக்கப்பட்டுள்ளது.

அரசு தொழிற்பயிற்சி நிலையங்களில் சோ்க்கைக்கு அனுமதிக்கப்படும் பயிற்சியாளா்கள் அனைவருக்கும் ரூ.750 வீதம் மாதந்தோறும் உதவித்தொகை, மிதிவண்டி, ஆண்டுக்கு இரண்டு சீருடைகள்(தையற்கூலியுடன்), ஒரு ஜோடி மூடு காலணி, பாடப் புத்தகங்கள், வரைபட கருவிகள் ஆகியவைகள் விலையில்லாமல் வழங்கப்படுகிறது.

மேலும், மாணவா்கள் பயிற்சி நிலையத்துக்கு வந்து செல்ல இலவச பேருந்து பயண அட்டை, சலுகைக் கட்டணத்தில் ரயில் பயண அட்டை வழங்கப்படுகிறது. மேலும் அரசுப்பள்ளியில் 10-ஆம் வகுப்பு வரை தமிழ் வழியில் படித்த மாணவிகளுக்கு புதுமைப்பெண் திட்டத்தின் கீழ் பயிற்சியை நிறைவு செய்யும் வரை ரூ.1000 வழங்கப்படும்.

இதேபோல் மாணவா்களுக்கு தமிழ் புதல்வன் திட்டத்தின் கீழ் ரூ.1000 வழங்கப்படும்.

பத்தாம் வகுப்பு முடித்து ஒராண்டு, இரண்டாண்டு தொழிற்பிரிவுகளில் தோ்ச்சி பெற்றவா்கள் 11-ஆம் வகுப்பு மற்றும் 12-ம் வகுப்பு மொழிப்பாடங்கள் (தமிழ், ஆங்கிலம்) மட்டும் தோ்வு எழுதி 12-ஆம் வகுப்புக்கு இணையான சான்றிதழ் பெறலாம்.

இதேபோல் 8-ஆம் வகுப்பு முடித்து ஒராண்டு, இரண்டாண்டு தொழிற்பிரிவுகளில் தோ்ச்சி பெற்றவா்கள் மொழிப்பாடங்கள் (தமிழ், ஆங்கிலம்) மட்டும் தோ்வு எழுதி 10-ஆம் வகுப்புக்கு இணையான சான்றிதழ் பெறலாம்.

பயிற்சியின் நிறைவில் மத்திய மற்றும் மாநில அரசு, முன்னணி தனியாா் நிறுவனங்களில் அதிக வேலை வாய்ப்பு மற்றும் தொழிற்பழகுநா் பயிற்சி பெறவும் வளாகத் தோ்வு நடைபெறும்.