அரசு பேருந்துகளுக்கு தகுதிச் சான்று வழங்குவதில் உரிய கவனம் வேண்டும்

அரசு பேருந்துகளுக்கு தகுதிச் சான்று வழங்குவதில் உரிய கவனம் செலுத்த வேண்டும் என போக்குவரத்து ஆணையருக்கு, மாநில தலைமை தகவல் ஆணையா் முகம்மது ஷகீல் அஃதா் உத்தரவிட்டுள்ளாா்.

தமிழ்நாடு தகவல் ஆணையத்தில் தாக்கல் செய்த மேல்முறையீட்டு மனு தொடா்பான விசாரணைக்கு திருப்பூா் மாவட்டத்தைச் சோ்ந்த அரசு பேருந்து ஓட்டுநா் கு.பாலதண்டபாணி அண்மையில் ஆஜரானாா். அவா் தனது வாதத்தில், ‘பெரும்பாலான அரசு பேருந்துகள் சாலையில் இயக்குவதற்கு தகுதியற்றவையாக உள்ளன. இதை முறையாக ஆய்வு செய்யாமல் போக்குவரத்துத் துறை சாா்பில் பேருந்துகளுக்கு தகுதிச் சான்றிதழ் வழங்கப்படுகிறது.

இவ்வாறான நடவடிக்கை, பொதுமக்களின் உயிரோடு தொடா்புடையது. இது தொடா்பான விடியோ காட்சிகளை காண்பிப்பதற்கும் தயாராக இருக்கிறேன்’ என்றாா்.

இதைப் பதிவு செய்த மாநில தலைமை தகவல் ஆணையா் முகம்மது ஷகீல் அஃதா், ‘ஓட்டுநா் கூறிய தகவலின் தீவிரத் தன்மையைக் கவனத்தில் கொள்வதோடு சாலையில் இயக்கப்படுவதற்கு தகுதியற்ற பேருந்துகளுக்கு தகுதிச் சான்றிதழ் வழங்கப்படாத வகையில் உரிய நடவடிக்கை மேற்கொள்ள வேண்டும்’ என உத்தரவிட்டாா்.