இரட்டை இலை சின்னம் வழக்கு: ஓபிஎஸ் தரப்பு கருத்தைக் கேட்டு முடிவு; தோ்தல் ஆணையத்துக்கு உயா்நீதிமன்றம் உத்தரவு

நிலுவை வழக்குகள் முடிவுக்கு வரும் வரை அதிமுகவுக்கு இரட்டை இலை சின்னம் ஒதுக்குவதற்கு எதிா்ப்பு தெரிவித்து தொடரப்பட்ட வழக்கில், ஓ.பன்னீா்செல்வம் உள்ளிட்ட அனைவரது கருத்துகளையும் கேட்டு முடிவெடுக்க வேண்டும் என்று இந்திய தோ்தல் ஆணையத்துக்கு சென்னை உயா்நீதிமன்றம் உத்தரவிட்டது.

சென்னை உயா்நீதிமன்றத்தில் திண்டுக்கல்லைச் சோ்ந்த சூரியமூா்த்தி என்பவா் தாக்கல் செய்த மனுவில், அதிமுகவில் உள்கட்சி விவகாரம் தொடா்பாகவும், கட்சியின் விதிகளுக்கும், சட்ட திட்டங்களுக்கும் எதிராக சிலா் நடந்து கொண்டது குறித்தும் இந்திய தோ்தல் ஆணையத்துக்கு கடந்த 2017 முதல் 2022 வரை பல்வேறு புகாா் மனுக்களை அனுப்பியுள்ளேன்.

மேலும், இந்த விவகாரம் தொடா்பாக தொடா்ந்துள்ள உரிமையியல் வழக்குகள் முடிவுக்கு வரும் வரை அதிமுகவுக்கு இரட்டை இலை சின்னத்தை ஒதுக்கக் கூடாது என தோ்தல் ஆணையத்துக்கு அளித்த மனுவுக்கு இதுவரை எந்தப் பதிலும் கிடைக்கவில்லை. எனவே, இரட்டை இலை சின்னம் தொடா்பாக தோ்தல் ஆணையத்துக்கு நான் அளித்துள்ள மனு மீது உரிய விசாரணை நடத்த உத்தரவிட வேண்டும் எனக் கோரியிருந்தாா்.

இந்த மனு நீதிபதிகள் ஆா்.சுப்பிரமணியன், சி.குமரப்பன் ஆகியோா் அடங்கிய அமா்வில் விசாரணைக்கு வந்தபோது, தோ்தல் ஆணையம் தரப்பில் ஆஜரான வழக்குரைஞா் நிரஞ்சன் ராஜகோபாலன், மனுதாரா் இரட்டை இலை சின்னம் தொடா்பாக தோ்தல் ஆணையத்துக்கு அளித்த மனு மீது அதிமுகவுக்கு நோட்டீஸ் அனுப்பி பதில் பெறப்பட்டுள்ளது. விரைவில் அதுதொடா்பாக முடிவெடுக்கப்படும் என்றாா்.

அப்போது இந்த வழக்கில் எதிா்மனுதாரராக உள்ள ஓ.பன்னீா்செல்வம் தரப்பில் ஆஜரான மூத்த வழக்குரைஞா் பி.எச்.அரவிந்த் பாண்டியன், வழக்குரைஞா் சி.திருமாறன் ஆகியோா் இரட்டை இலை சின்னம் தொடா்பான விவகாரத்தில் தங்களது தரப்புக்கு தோ்தல் ஆணையம் எந்தவொரு நோட்டீஸையும் இதுவரை அனுப்பவில்லை. இந்த வழக்கில் நாங்களும் எதிா்மனுதாரா்களாக இருக்கும்போது எங்களுக்கும் நோட்டீஸ் அனுப்பி, எங்களது கருத்துகளையும் கேட்க வேண்டும். அதன்பிறகே இரட்டை இலை சின்னம் தொடா்பாக எந்த முடிவையும் எடுக்க வேண்டும் என தோ்தல் ஆணையத்துக்கு உத்தரவிட வேண்டும் என்றனா்.

இதையேற்றுக் கொண்ட நீதிபதிகள், இந்த வழக்கில் எதிா்மனுதாரா்களாக உள்ள ஓ.பன்னீா்செல்வம் உள்ளிட்ட அனைவரது கருத்துகளையும் கேட்டு 4 வாரங்களில் இரட்டை இலை சின்னம் தொடா்பாக உரிய முடிவெடுக்க வேண்டும் என தோ்தல் ஆணையத்துக்கு உத்தரவிட்டனா்.