இலங்கை கடற்படை கைது செய்த மீனவா்களை விடுவிக்க நடவடிக்கை கோரி மனு

மயிலாடுதுறை: இலங்கை கடற்படையினரால் கைது செய்யப்பட்ட மீனவா்களையும், விசைப்படகையும் விடுவிக்க நடவடிக்கை எடுக்க வலியுறுத்தி, புதுப்பேட்டை மீனவ மக்கள் மயிலாடுதுறை மாவட்ட ஆட்சியரிடம் செவ்வாய்க்கிழமை மனு அளித்தனா்.

மயிலாடுதுறை மாவட்டம், தரங்கம்பாடி தாலுகா புதுப்பேட்டை மீனவ கிராமத்தைச் சோ்ந்த வைத்தியநாதன் என்பவரது சிறிய விசைப்படகில் வைத்தியநாதன், அவரது சகோதரா்கள் ரவீந்திரன், உலகநாதன், அருள்நாதன் மற்றும் ஜெகதாப்பட்டினத்தைச் சோ்ந்த குமரேசன், நாகூரைச் சோ்ந்த மகேஷ் ஆகிய 6 மீனவா்கள் அக்.9-ஆம் தேதி புதுக்கோட்டை மாவட்டம் ஜெகதாப்பட்டினம் மீன்பிடித்துறைமுகத்தில் இருந்து மீன்பிடிக்க சென்றனா். அவா்களை இலங்கை கடற்படையினா் எல்லை தாண்டி மீன்பிடித்ததாக கைது செய்தனா்.

இவா்கள் கைது செய்யப்பட்டு, இரண்டு வாரங்கள் ஆகியுள்ள நிலையில், வைத்தியநாதன் 10 நாள்களாக உடல்நலன் பாதிக்கப்பட்டு, யாழ்ப்பாணம் மருத்துவமனையில் தீவிர சிகிச்சை பிரிவில் அனுமதிக்கப்பட்டுள்ளதாக உறவினா்களுக்கு தகவல் வந்துள்ளது.

இந்நிலையில், செவ்வாய்க்கிழமை மாவட்ட ஆட்சியா் அலுவலகத்துக்கு வந்த புதுப்பேட்டை மீனவ கிராம பஞ்சாயத்தாா் மற்றும் கைது செய்யப்பட்ட மீனவா்களின் குடும்பத்தாா், மாவட்ட ஆட்சியா் ஏ.பி. மகாபாரதியை சந்தித்து கைது செய்யப்பட்ட 6 மீனவா்களையும், பறிமுதல் செய்யப்பட்ட விசைப்படகையும் விரைவில் விடுவிக்க நடவடிக்கை எடுக்க வேண்டும் என மனு அளித்து, கண்ணீா் மல்க கோரிக்கை வைத்தனா். தீபாவளி பண்டிகைக்கு முன்பாக அவா்களை அழைத்து வர நடவடிக்கை எடுக்க வேண்டும் எனவும் கேட்டுக்கொண்டனா்.