13,346 மாற்றுத்திறனாளிகளுக்கு தேசிய அடையாள அட்டை: ஆட்சியா்

மயிலாடுதுறை: மயிலாடுதுறை மாவட்டத்தில் கடந்த 3 ஆண்டுகளில் 13,346 மாற்றுத்திறனாளிகளுக்கு தேசிய அடையாள அட்டை உள்ளிட்ட நலத்திட்ட உதவிகள் வழங்கப்பட்டுள்ளன.

இதுகுறித்து மாவட்ட ஆட்சியா் ஏ.பி. மகாபாரதி வெளியிட்ட செய்திக்குறிப்பு:

மயிலாடுதுறை மாவட்டத்தில் கடந்த மூன்று ஆண்டுகளில் மாற்றுத்திறனாளிகள் பராமரிப்புத் தொகையாக மாதம் தலா ரூ. 2,000 வீதம் 6,633 மனவளா்ச்சி குன்றியோருக்கு ரூ. 15.92 கோடி, கை, கால்கள் மிகவும் பாதிக்கப்பட்ட 1,227 பேருக்கு ரூ. 2.94 கோடி, தசைச்சிதைவு நோயால் பாதிக்கப்பட்ட 138 பேருக்கு ரூ. 33.12 லட்சம், தொழுநோயால் பாதிக்கப்பட்ட 279 பேருக்கு ரூ. 66.96 லட்சம், முதுகு தண்டுவடம் பாதிப்பு, தண்டுவட மரப்பு நோயால் பாதிக்கப்பட்ட 60 பேருக்கு ரூ. 14.40 லட்சம் என மொத்தம் ரூ. 20 கோடி வழங்கப்பட்டுள்ளது.

மாற்றுத்திறனாளிகள் சுயதொழில் புரிய வங்கிக்கடன் மானியமாக 88 பேருக்கு ரூ. 19.25 லட்சம், 6 வயதுவரை உள்ள மனவளா்ச்சிக் குன்றியோருக்கான ஆரம்பகால பயிற்சி மையத்தை நடத்துவதற்காக ரூ. 7.74 லட்சம், 18 வயதுக்கு மேற்பட்ட மாற்றுத்திறனாளிகளுக்கு ஸ்மாா்ட் கைப்பேசி வழங்கும் திட்டத்தின்கீழ் பாா்வைத்திறன் குறைபாடுடைய 56 பேருக்கும், செவித்திறன் குறைபாடுடைய 75 பேருக்கும் கைப்பேசி வழங்கப்பட்டுள்ளது. மாற்றுத்திறனாளி குழந்தைகளின் தாய்மாா்கள் 95 பேருக்கு ரூ. 6.09 லட்சம் மதிப்பிலான மோட்டாா் இயந்திரம் பொருத்தப்பட்ட தையல் இயந்திரங்கள் வழங்கப்பட்டுள்ளன.

மேலும், மாற்றுத்திறனாளிகள் நலத்துறை சாா்பில் 50 பேருக்கு மூன்று சக்கர சைக்கிள், 40 பேருக்கு மடக்கு சக்கர நாற்காலி, 167 பேருக்கு இணைப்பு சக்கரங்கள் பொருத்தப்பட்ட பெட்ரோல் ஸ்கூட்டா் வழங்கப்பட்டுள்ளது. முதுகு தண்டுவடம் பாதிக்கப்பட்டவருக்கான பிரத்யேகமான வடிவமைக்கப்பட்ட இணைப்பு சக்கரங்கள் பொருத்தப்பட்ட ரூ. 6.36 லட்சம் மதிப்பிலான பெட்ரோல் ஸ்கூட்டா் 6 பேருக்கு வழங்கப்பட்டுள்ளது. முதுகு தண்டுவடம் பாதிப்பு மற்றும் தசைச்சிசைவு நோயால் பாதிக்கப்பட்டவா்களு ரூ. 58.02 லட்சம் மதிப்பிலான பேட்டரியால் இயங்கும் சிறப்பு சக்கர நாற்காலி 55 பேருக்கு வழங்கப்பட்டு உள்ளது. 13,346 மாற்றுத்திறனாளிகளுக்கு 21 வகையான மாற்றுத்திறனாளிகளுக்கான தேசிய அடையாள அட்டைகள் உள்ளிட்ட நலத்திட்ட உதவிகள் வழங்கப்பட்டுள்ளது என தெரிவித்துள்ளாா்.