உ.பி.யில் சாலை விபத்து: புதுமணத் தம்பதி உள்பட 7 பேர் பலி!

உத்தரப் பிரதேசத்தின் பிஜ்னோர் நகரில் கார்-டெம்போ மீது மோதிய விபத்தில் ஜார்க்கண்டில் இருந்து திரும்பிய புதுமணத் தம்பதி உள்பட 7 பேர் பலியாகினர்.

டேராடூன்-நைனிடால் நெடுஞ்சாலையில் தம்பூர் தீயணைப்பு நிலையம் அருகே அதிகாலை 2 மணிக்கு இந்த விபத்து நடைபெற்றுள்ளது. தம்பூர் பகுதியில் அமைந்துள்ள மணமகனின் வீட்டுக்குச் செல்வதற்காகப் புதுமண தம்பதி உள்பட அவரது குடும்பத்தினர் டெம்போவில் பயணித்துள்ளனர்.

அப்போது டெம்போவை முந்திச் செல்ல முயன்ற கார் பின்னால் இருந்த மோதியதில் அருகிலிருந்த பள்ளம் ஒன்றில் கார், டெம்போ இரண்டும் கவிழ்ந்து விபத்திற்குள்ளானது. இந்த விபத்தில் புதுமணத் தம்பதி, ஓட்டுநர் உள்பட 7 பேர் சம்பவ இடத்திலேயே உயிரிழந்தனர்.

காரிலி பயணித்த இருவர் காயமடைந்துள்ளதாகவும், உயிரிழந்தவர்களின் சடலங்கள் பிரேதப் பரிசோதனைக்காக அனுப்பிவைக்கப்பட்டுள்ளதாகவும் போலீஸார் தெரிவித்தனர்.

அடர் பனியால் தெளிவற்ற வானிலையே விபத்துக்குக் காரணமாக அமைந்தது. இந்த விபத்துக்கு முதல்வர் யோகி ஆதித்யநாத் இரங்கல் தெரிவித்துள்ளார். நிவாரண பணிகளை விரைந்து மேற்கொள்ளும்படி அதிகாரிகளுக்கு உத்தரவிட்டுள்ளார்.