உடுமலை வனச் சரகத்தில் யானை உயிரிழப்பு

உடுமலை வனச் சரகத்தில் காயங்களுடன் யானை உயிரிழந்து கிடந்தது சனிக்கிழமை தெரியவந்தது.

திருப்பூா் மாவட்டம், உடுமலை வனச் சரகத்துக்கு உள்பட்ட ஈசல்திட்டு கிழக்கு சுற்று, செட்டிமொடக்கு பகுதியில் யானை உயிரிழந்து கிடப்பதாக வனத் துறையினருக்கு சனிக்கிழமை தகவல் கிடைத்தது.

உதவி வனப் பாதுகாவலா் கே.கீதா, உடுமலை வனச் சரகா் மணிகண்டன், கால்நடை மருத்துவா் ஈ.விஜயராகவன் ஆகியோா் சம்பவ இடத்துக்கு சென்று ஆய்வு மேற்கொண்டனா். ஆய்வில் அங்கு காயங்களுடன் உயிரிழந்து கிடந்தது 5 வயது மதிக்கத்தக்க ஆண் யானை எனத் தெரியவந்தது.

இது குறித்து வனத் துறையினா் கூறியதாவது:

உயிரிழந்த யானையின் மாா்பு பகுதி மற்றும் சில இடங்களில் ஏற்பட்ட காயங்களால் உயிரிழந்திருப்பது உடற்கூறாய்வு மூலம் தெரியவந்துள்ளது. இது குறித்து விசாரணை நடைபெற்று வருகிறது என்றனா்.