`எங்களையும் அடிச்சாங்க, கோட்ச்சையும் அடிச்சாங்க' -பஞ்சாப்பில் நடந்தது என்ன? கபடி வீராங்கனை விளக்கம்
Admin
- yesterday
பஞ்சாப் மாநிலத்தில் 2024-2025ஆம் ஆண்டிற்கான பல்கலைக்கழகங்களுக்கு இடையேயான மகளிர் கபடி போட்டி நடைபெற்றது.
இந்த போட்டியில், இந்தியாவில் உள்ள பல்கலைக்கழகங்களைச் சேர்ந்த கபடி வீராங்கனைகள் பங்கேற்றனர். அந்த வகையில், தமிழ்நாட்டில் இருந்து பெரியார் பல்கலைக்கழகம், அழகப்பா பல்கலைக்கழகம், பாரதியார் பல்கலைக்கழகம், அன்னை தெரசா பல்கலைக்கழகம் உள்ளிட்ட பல்கலைக்கழகத்தில் இருந்து கபடி வீராங்கனைகள் பங்கேற்றனர். அதில் அன்னை தெரசா பல்கலைக்கழக கபடி வீராங்கனைகளுக்கும், தர்பங்கா பல்கலைக்கழக கபடி வீராங்கனைகளுக்கும் இடையே கடந்த 24ஆம் தேதி (24.01.2025) கபடி போட்டி நடைபெற்றது.
அப்போது பஞ்சாபில் தமிழக வீராங்கனைகள் மீது தாக்குதல் நடத்தப்பட்ட சம்பவம் மக்கள் மத்தியில் பெரும் பரபரப்பை ஏற்படுத்தியிருந்தது. இந்நிலையில் பஞ்சாப் சென்ற தமிழக வீரர்கள் பஞ்சாபில் இருந்து டெல்லி அழைத்து வரப்பட்டனர். அதன் பின்னர் அங்கிருந்து ரயில் மூலம் இன்று (28.01.2025) சென்னை திரும்பியுள்ளனர். தமிழ்நாடு விளையாட்டு மேம்பாட்டு ஆணையத்தின் அதிகாரிகள் வீராங்கனைகளுக்கு வரவேற்பு அளித்தனர். அதன் பிறகு செய்தியாளர்களைச் சந்தித்த தாக்குதலுக்கு உள்ளான கபடி வீராங்கனை சம்பவம் தொடர்பாக விளக்கம் அளித்திருக்கிறார்.
இது தொடர்பாக பேசிய அவர், "அன்னை தெரசா பல்கலைக்கழகம் சார்பாக கபடி போட்டியில் கலந்துக்கொண்டோம். தர்பங்கா பல்கலைக்கழக மாணவிகளுடன் எங்களுக்கு கால் இறுதிசுற்று நடைபெற்றது. போட்டியில் நான் விளையாடும்போது கிக் விட்டேன். அதற்கு என்னை அவர்கள் அடித்தார்கள். என்னை தற்காத்துக்கொள்ள நானும் அவர்களை அடித்தேன். அதன் பிறகு என் சகப்போட்டியாளர்கள் வந்தர்கள். கோட்ச் சண்டையை தடுக்க வந்தார். ஆனால் அவர்கள் அடிக்க வந்த மாதிரி தவறாக எடுத்துக்கொண்டார்கள்.
பிறகு பெரிய சண்டையாக மாறிவிட்டது. முதலில் அவர்கள்தான் எங்களை அடிக்க ஆரம்பித்தார்கள். எங்கள் கோட்சின் இரண்டு கைகளையும் பிடித்து ரூமிற்கு அழைத்து சென்று அடித்தார்கள். நாங்கள் சாருக்கு ஃபோன் செய்து பிரச்னையை சொன்னோம். அவர் உணவுத்துறை அமைச்சருக்கு அழைத்து விஷயத்தை சொல்லவும் உணவுத்துறை அமைச்சர் துணை முதலமைச்சருக்கு அழைத்து பிரச்னையை விவரித்திருக்கிறார். பிறகு பிரச்சனையை தீர்க்க அரசு தரப்பில் இருந்து அனைத்து நடவடிக்கைகளும் எடுத்தார்கள்." என்று தெரிவித்தார்.
சினிமா விகடனின் பிரத்யேக Whatsapp க்ரூப்
https://chat.whatsapp.com/KzgH8aPb2MI9PVttY53JpX
சினிமா தொடர்பான எக்ஸ்க்ளூசிவ் அப்டேட், அசத்தல் பேட்டிகள், டி.வி அப்டேட்கள் என எதையும் மிஸ் செய்யாமல் தெரிந்து கொள்ள...
உங்கள் வாட்ஸ் அப் மூலமே இணைந்திருங்கள் சினிமா விகடனுடன்...
