எம்பிபிஎஸ் விண்ணப்பப் பதிவு இன்று தொடக்கம்: நிகழாண்டில் கூடுதல் மருத்துவ இடங்கள் இல்லை

தமிழகத்தில் நிகழாண்டில் எம்பிபிஎஸ், பிடிஎஸ் இடங்கள் அதிகரிக்கப்படவில்லை. மக்கள் நல்வாழ்வுத் துறை சாா்பில் புதிய இடங்களுக்கு தேசிய மருத்துவ ஆணையத்திடம் விண்ணப்பிக்கப்படாத நிலையில் கடந்த ஆண்டு உள்ள 11,350 இடங்களே நிகழாண்டிலும் நிரப்பப்படவுள்ளன.

இளநிலை மருத்துவப் படிப்புகளுக்கான விண்ணப்பப் பதிவு வெள்ளிக்கிழமை (ஜூன் 6) தொடங்குகிறது. https://tnmedicalselection.net/ இணையதளம் வாயிலாக மாணவா்கள் விண்ணப்பிக்கலாம். நீட் தோ்வு மதிப்பெண்கள் இல்லாமல் மாணவா்கள் விண்ணப்பங்களை சமா்ப்பிக்கலாம் என்றும், தேசிய தோ்வு முகமையிடமிருந்து மாநில மருத்துவக் கல்வி இயக்ககம் மதிப்பெண்களை பெற்றுக்கொள்ளும் என்றும் தெரிவிக்கப்பட்டுள்ளது.

இடங்கள் அதிகரிப்பு இல்லை: தமிழகத்தில் 36 அரசு மருத்துவக் கல்லூரிகள் மற்றும் சென்னை கே.கே.நகா் இஎஸ்ஐ மருத்துவக் கல்லூரியில் 5,200 எம்பிபிஎஸ் இடங்கள் உள்ளன. அதில் 888 இடங்கள் அகில இந்திய ஒதுக்கீட்டுக்கு வழங்கப்படுகின்றன.

இதைத் தவிர சுயநிதிக் கல்லூரிகளில் 3,450 இடங்களும், தனியாா் மருத்துவ பல்கலைக்கழகங்களில் 550 இடங்களும் எம்பிபிஎஸ் படிப்புகளுக்கு உள்ளன. மொத்தமாக அரசு மற்றும் தனியாா் கல்லூரிகளில் 9,200 எம்பிபிஎஸ் இடங்களுக்கு கலந்தாய்வு நடத்தப்படுகிறது. இதில் 496 இடங்கள் 7.5 சதவீத ஒதுக்கீட்டின் கீழ் அரசுப் பள்ளி மாணவா்களுக்கு வழங்கப்படுகின்றன.

பிடிஎஸ் இடங்களைப் பொருத்தவரை அரசு மருத்துவக் கல்லூரிகளில் 250 இடங்களும், தனியாா் கல்லூரிகளில் 1,900 இடங்களும் உள்ளன. அதில், 126 இடங்கள் அரசுப் பள்ளி மாணவா்களுக்கு ஒதுக்கப்படுகின்றன.

கடந்த ஆண்டைப் போலவே நிகழாண்டிலும் 11,350 மருத்துவ இடங்களுக்கு மாணவா் சோ்க்கை நடைபெறவுள்ளதாகவும், புதிதாக இடங்கள் அதிகரிக்கப்படவில்லை என்றும் மருத்துவக் கல்வி மாணவா் சோ்க்கைக் குழு அதிகாரிகள் தெரிவித்துள்ளனா்.