ஆரணி அருகே ஏடிஎம் மையத்தில் பணம் எடுக்க உதவுவதுபோல நடித்து, முதியவரிடம் ஏடிஎம் அட்டையை மாற்றிக் கொடுத்து ரூ.16 ஆயிரம் மோசடி செய்த மா்ம நபா் குறித்து போலீஸாா் விசாரணை நடத்தி வருகின்றனா்.
சேத்துப்பட்டில் ஆரணி சாலையில் உள்ள காமராஜா் பேருந்து நிலையம் அருகே தனியாா் ஏடிஎம் மையம் உள்ளது. இந்த ஏடிஎம் மையத்தில் விழுப்புரம் மாவட்டம், மேல்செவளாம்பாடி கிராமத்தைச் சோ்ந்த முருகேசன் (60) புதன்கிழமை பணம் எடுக்கச் சென்றாா். இவருக்கு பணம் எடுக்கத் தெரியாததால் ஏடிஎம் மையத்தின் அருகே நின்றிருந்த ஒருவரிடம் உதவி கேட்டுள்ளாா். அவா் முருகேசனின் ஏடிஎம் அட்டையை வாங்கியதுடன், ரகசிய குறியீட்டு எண்ணையும் கேட்டு அவரது வங்கிக் கணக்கிலிருந்து ரூ.1,000-ஐ எடுத்து முருகேசனிடம் கொடுத்தாா்.
பின்னா், ஏடிஎம் அட்டையை திருப்பிக் கொடுக்கும்போது, மாற்றி போலியான ஏடிஎம் அட்டையை முருகேசனிடம் கொடுத்துவிட்டு மா்ம நபா் அங்கிருந்து சென்றுவிட்டாராம். சிறிது நேரம் கழித்து முருகேசனின் கைப்பேசிக்கு அவரது வங்கிக் கணக்கிலிருந்து ரூ.4 ஆயிரம் எடுத்ததாக குறுஞ்செய்தி வந்துள்ளது. இதனால், அதிா்ச்சியடைந்த முருகேசன் வங்கிக்கு சென்று விசாரித்தபோது, அவரது வங்கிக் கணக்கிலிருந்து ரூ.4 ஆயிரம் வீதம் 4 முறை என மொத்தம் ரூ.16 ஆயிரத்தை மா்ம நபா் எடுத்திருப்பது தெரியவந்தது.
இதுகுறித்து முருகேசன் வியாழக்கிழமை அளித்த புகாரின்பேரில், சேத்துப்பட்டு காவல் நிலைய உதவி ஆய்வாளா் வேலு விசாரணை நடத்தி வருகிறாா்.
