'ஓகே' என்று சொன்ன ஸ்டேஷன் மாஸ்டரால் ரூ.3 கோடி இழப்பு; விவகாரத்து வரை போன விவகாரம்; நடந்தது என்ன?

விசாகபட்டினத்தைச் சேர்ந்த நாகஸ்வரராவ் என்பவர் ரயில்வே ஸ்டேஷன் மாஸ்டராக இருக்கிறார். இவருக்கு சத்தீஷ்கரில் உள்ள துர்க் என்ற நகரத்தைச் சேர்ந்த பெண்ணை திருமணம் செய்து வைத்தனர். கடந்த 2011ம் ஆண்டு இத்திருமணம் நடந்தது. திருமணம் முடிந்த சில நாட்களில் அவர்களுக்குள் பிரச்னை ஏற்பட்டது. அடிக்கடி சண்டை போட்டுள்ளனர்.

இந்நிலையில், சம்பவத்தன்று நாகேஸ்வரராவ் இரவு பணிக்குச் சென்று இருந்தார். அந்நேரம் அவரது மனைவிக்கு போன் செய்து பேசிக்கொண்டிருந்தார்.

போனில் இருவருக்கும் இடையே கடுமையான வாக்குவாதம் ஏற்பட்டது. இந்த வாக்குவாதத்தின்போது, "பிரச்னையை வீட்டில் வைத்துப் பேசிக்கொள்ளலாம் ஓகே" என்று நாகேஸ்வரராவ் தனது மனைவியிடம் தெரிவித்தார். அந்நேரம் அவர் ரயில்வே அதிகாரிகளிடம் பேசக்கூடிய மைக்ரோபோன் ஆனில் இருந்தது. அதில் 'ஓகே' என்ற வார்த்தை எதிர்முனையிலிருந்த ரயில்வே ஊழியருக்குக் கேட்டுள்ளது. உடனே அந்த ஊழியர் காத்திருந்த ரயில் ஒன்றுக்கு கிரீன் சிக்னல் கொடுத்தார். இதனால் அந்த ரயில் நக்சலைட்களின் தாக்கம் இருக்கும் கட்டுப்படுத்தப்பட்ட வழித்தடத்திற்குள் சென்றது.

அதிர்ஷ்டவசமாக அந்த வழித்தடத்தில் ரயில் எந்த வித விபத்திலும் சிக்கவில்லை. ஆனால் தவறுதலான வழித்தடத்திற்கு ரயிலை இரவு நேரத்தில் அனுப்பி விதிமீறலில் ஈடுபட்டதால் ரயில்வேயிக்கு ரூ.3 கோடி அளவுக்கு இழப்பு ஏற்பட்டது.

இதையடுத்து ரயில்வே நிர்வாகம் நாகேஸ்வரராவைப் பணியிலிருந்து இடைநீக்கம் செய்தது. இதனால் கோபத்தில் நாகேஸ்வரராவ் விசாகப்பட்டினம் நீதிமன்றத்தில் தனது மனைவியிடமிருந்து விவாகரத்து கோரி மனுத்தாக்கல் செய்தார். உடனே நாகேஸ்வரராவ், அவரது 70 வயது தந்தை, மூத்த சகோதரர், மைத்துனி ஆகியோர் மீது நாகேஸ்வரராவ் மனைவி தன்னைச் சித்ரவதை செய்வதாக காவல்துறையில் புகார் செய்தார். விசாகப்பட்டினத்தில் வழக்கு நடைபெறுவதால் தனது உயிருக்கு அச்சுறுத்தல் ஏற்படும் என்று கூறி விசாரணையை துர்க் நகரத்திற்கு மாற்ற வேண்டும் என்று கோரி உச்ச நீதிமன்றத்தில் அப்பெண் மனுத்தாக்கல் செய்தார்.

அவரின் கோரிக்கையை ஏற்ற உச்ச நீதிமன்றத்தில் வழக்கு விசாரணையை துர்க்கிற்கு மாற்றி உத்தரவிட்டது. துர்க் நீதிமன்றம் ரயில்வே ஊழியரின் விவாகரத்து கோரிக்கை மனுவைத் தள்ளுபடி செய்தது. இதையடுத்து இத்தீர்ப்பை எதிர்த்து சத்தீஷ்கர் உயர் நீதிமன்றத்தில் நாகேஸ்வரராவ் மேல் முறையீடு செய்தார். இம்மனு நீதிபதிகள் ரஞ்சனி துபே, சஞ்சய் குமார் ஆகியோர் அடங்கிய அமர்வு முன்பு விசாரணைக்கு வந்தது. விசாரணையின்போது தனது கணவருக்கு அவரது சகோதரரின் மனைவியுடன் தொடர்பு இருந்ததாக நாகேஸ்வரராவ் மனைவி தெரிவித்தார். அதோடு வரதட்சணை கேட்டுக் கொடுமைப்படுத்துவதாகவும் குறிப்பிட்டார்.

ஆனால் இக்குற்றச்சாட்டுகள் அனைத்தும் ஆதாரமற்றவை என்று குறிப்பிட்ட நீதிபதிகள் நாகேஸ்வரராவிற்கு விவாகரத்து வழங்கி உத்தரவிட்டனர். போலியான மற்றும் ஆதாரமற்ற குற்றச்சாட்டுகள் கொடூரமானது என்று நீதிபதிகள் குறிப்பிட்டனர்.

Junior Vikatan-ன் பிரத்யேக Whatsapp Group...

இணைவதற்கு இங்கே க்ளிக் செய்யவும்https://bit.ly/3OITqxs

வணக்கம்,

BIG BREAKINGS முதல்... அரசியல், சமூகம், க்ரைம், சினிமா என அனைத்து ஏரியாக்களின் அசராத அப்டேட்ஸ், ஆழமான கட்டுரைகள்.

ஜூனியர் விகடன் இதழ் மற்றும் டிஜிட்டலில் கவனம் ஈர்க்கும் கட்டுரைகள் இங்கே உடனுக்குடன்... https://bit.ly/3OITqxs