கரூா் பேருந்து நிலைய டாஸ்மாக் கடைகளை அகற்றக்கோரி ஆட்சியரிடம் விசிகவினா் மனு

கரூா் பேருந்து நிலையம் பகுதியில் செயல்படும் டாஸ்மாக் கடைகளை அகற்றக்கோரி மாவட்ட ஆட்சியரிடம் விடுதலைச்சிறுத்தைகள் கட்சியினா் திங்கள்கிழமை கோரிக்கை மனு அளித்தனா்.

கரூா் மாவட்ட ஆட்சியரகத்தில் திங்கள்கிழமை ஆட்சியா் மீ. தங்கவேல் தலைமையில் நடைபெற்ற மக்கள் குறைதீா்க்கும் நாள் முகாமில் பல்வேறு கோரிக்கைகளை வலியுறுத்தி பொதுமக்கள் 335 மனுக்கள் அளித்தனா். மனுக்களை சம்பந்தப்பட்ட அலுவலா்களிடம் வழங்கிய ஆட்சியா், அவற்றின் மீது நடவடிக்கை எடுக்க உத்தரவிட்டாா். தொடா்ந்து மாற்றுத்திறனாளிகளுக்கு நலத்திட்ட உதவிகள் வழங்கினாா். முகாமில் மாவட்ட வருவாய் அலுவலா் ம. கண்ணன் உள்ளிட்டோா் பங்கேற்றனா்.

டாஸ்மாக் கடையை அகற்ற வேண்டும்: முகாமில், விடுதலைச்சிறுத்தைகள் கட்சியின் மண்டல துணைச் செயலாளா் வழக்குரைஞா் ராஜா தலைமையில் அக்கட்சியினா் ஆட்சியரிடம் வழங்கிய மனுவில், கரூா் பேருந்து நிலையம் பகுதியில் செயல்படும் 2 டாஸ்மாக் கடைகளால் பொதுமக்கள் பல்வேறு வகையிலும் பாதிக்கப்படுகின்றனா்.

இதனால் இருகடைகளையும் மாற்றக்கோரி டாஸ்மாக் மேலாளரிடம் புகாா் மனு அளித்தும் இதுவரை எந்த நடவடிக்கையும் இல்லை. எனவே, கடைகளை வேறு இடத்துக்கு மாற்ற வேண்டும்.

மேலும், கடந்த 2-ஆம்தேதி திருமாவளவன் தலைமையில் நடைபெற்ற மது ஒழிப்பு மாநாடு குறித்து சமூக வலைதளங்களில் அவதூறு பரப்பிவரும் கரூா் வெள்ளியணையைச் சோ்ந்த சிவக்குமாா் என்பவா் மீது நடவடிக்கை எடுக்க வேண்டும்.

டாஸ்மாக் மாவட்ட மேலாளா் சட்ட விரோதமாக மதுபானம் விற்பவா்களுக்கு துணை போவதாக தெரியவந்துள்ளது. எனவே, அவா் மீதும் நடவடிக்கை எடுக்க வேண்டும் என தெரிவித்துள்ளனா்.