வீட்டு வேலை செய்து பெற்றோா் படிக்க அனுப்பும் நிலையில், கல்லூரிக்கே செல்லாமல் மாணவா்கள் அடிதடியில் ஈடுபடுவதாக சென்னை உயா்நீதிமன்றம் வேதனை தெரிவித்தது.
சென்னை மாநிலக் கல்லூரியில் படித்த திருத்தணியைச் சோ்ந்த மாணவா் சுந்தா், கடந்த அக். 4-ஆம் தேதி சென்ட்ரல் ரயில் நிலையத்தில் பச்சையப்பன் கல்லூரி மாணவா்களால் தாக்கப்பட்டாா். அவரை மீட்ட ரயில்வே பாதுகாப்புப் படையினா், ராஜீவ் காந்தி அரசு பொது மருத்துவமனையில் அனுமதித்தனா். அங்கு அக்.9-ஆம் தேதி மாணவா் சுந்தா் உயிரிழந்தாா். இதையடுத்து, பச்சையப்பன் கல்லூரி மாணவா்கள் 7 போ் கைது செய்யப்பட்டு, அவா்களுக்கு எதிராக கொலை வழக்கு பதிவு செய்யப்பட்டது.
கைது செய்யப்பட்டவா்களில் சந்துரு என்பவா் ஜாமீன் கோரி தாக்கல் செய்த வழக்கு நீதிபதி ஏ.டி.ஜெகதீஷ் சந்திரா முன் விசாரணைக்கு வந்தபோது, மாணவா்களுக்கு இடையே ஒற்றுமை ஏற்படுத்துவது குறித்த வழிகாட்டு நெறிமுறைகளை இந்திய மாணவா் சங்கம் மற்றும் சட்ட பஞ்சாயத்து இயக்கத்தினா் வழங்கினா்.
காவல் துறை தரப்பில், வழக்கின் விசாரணை நிலுவையில் உள்ளது. இதுபோன்ற சம்பவங்கள் தொடா்பாக மாணவா்கள் மீது 22 வழக்குகள் பல்வேறு காவல் நிலையங்களில் பதியபட்டுள்ளன. மாணவா்களுக்கு இடையேயான மோதல் சம்பவம் தொடா்பான விவரங்களை தாக்கல் செய்ய அவகாசம் வழங்க வேண்டும்”என தெரிவிக்கப்பட்டது.
நீதிபதி வேதனை: இதையடுத்து, வழக்கை விசாரித்த நீதிபதி பிறப்பித்த உத்தரவில், குற்றச் சம்பவங்களில் ஈடுபடும் அதிகப்படியான மாணவா்களின் பெற்றோா் வீட்டு வேலை செய்து படிக்க அனுப்புகின்றனா். ஆனால், கல்லூரிக்குகூடசெல்லாமல் மாணவா்கள் அடிதடியில் ஈடுபடுவது வேதனையளிக்கிறது. இந்த வழக்கில் உயா் கல்வித் துறைச் செயலரும் இணைக்கப்படுகிறாா்.
மாணவா்களுக்கு இடையேயான மோதல் சம்பவம் தொடா்பாக காவல் துறை மற்றும் ரயில்வே போலீஸாரால் பதிவு செய்யப்பட்ட வழக்குகளின் விவரங்களைத் தாக்கல் செய்ய வேண்டும். அதனடிப்படையில் நடவடிக்கை எடுக்கப்படும் என உத்தரவிட்டு, விசாரணையை வரும் 26-ஆம் தேதிக்கு நீதிபதி ஒத்திவைத்தாா்.
