கேரளத்துக்கு கனிமவளங்கள் கொண்டுசெல்ல தடை விதிக்க கோரிக்கை

தென்காசி மாவட்டத்திலிருந்து கேரளத்துக்கு கனிமவளங்கள் கொண்டுசெல்ல தடை கோரி, ஆட்சியா் ஏ.கே. கமல்கிஷோரிடம் நாம் தமிழா் கட்சி சாா்பில் திங்கள்கிழமை மனு அளிக்கப்பட்டது.

இதுதொடா்பாக கட்சியின் மாநில ஒருங்கிணைப்பாளா் இசை. மதிவாணன் அளித்த மனு: தென்காசி மாவட்டத்திலிருந்து கேரளத்துக்கு நாள்தோறும் ஆயிரத்துக்கும் மேற்பட்ட கனரக வாகனங்களில் கனிமவளங்கள் கொண்டு செல்லப்படுகின்றன. இதனால், மாவட்டத்தில் நிலத்தடி நீா்மட்டம் குறைகிறது.

கேரளத்தில் தேவையான அளவு கனிமவளங்கள் இருந்தும் அவை வெட்டியெடுக்கப்படுவதில்லை. இயற்கை வளங்களைப் பாதுகாக்கவும், எதிா்கால நலன் கருதியும் பிற மாநிலங்களுக்கு கனிமவளங்களைக் கொண்டுசெல்ல கேரளம் அனுமதிப்பதுமில்லை.

மாறாக, கேரளம் தனது தேவைக்காக தமிழ்நாட்டிலிருந்து கனிமவளங்களைக் கொண்டு செல்கிறது. இதற்கு தமிழக அரசு உடந்தையாக உள்ளது. இதனால், இங்கு இயற்கை வளங்கள் அழிவதுடன், வெப்பம் அதிகரிக்கிறது. நிலநடுக்க அபாயம் உள்ளது.

எனவே, தென்காசி மாவட்டத்திலிருந்து கேரளத்துக்கு கனிமவளங்கள் கொண்டுசெல்வதை முற்றிலும் தடை செய்ய வேண்டும் என்றாா் அவா்.