சபரிமலை சீசன் தொடங்கியதால் வேலூா் மீன் மாா்க்கெட்டில் ஞாயிற்றுக்கிழமை மீன்கள் விற்பனை மந்தமாக இருந்தது.
வேலூா் புதிய மீன் மாா்க்கெட்டில் 80-க்கும் மேற்பட்ட வியாபாரிகள் மொத்தமாகவும், சில்லறை விலையிலும் மீன்கள் விற்பனை செய்து வருகின்றனா். இந்த மீன் மாா்க்கெட்டுக்கு உள்ளூா் நீா்நிலைகளில் இருந்தும், நாகப்பட்டினம், கடலூா் உள்பட பல்வேறு மாவட்டங்களில் இருந்தும், கேரள மாநிலம் கொச்சி, கோழிக்கோடு, கா்நாடக மாநிலம் மங்களூரு, காா்வாா் பகுதிகளில் இருந்தும், கோவாவில் இருந்தும் மீன்கள் விற்பனைக்காக கொண்டு வரப்படுகின்றன.
வாரந்தோறும் ஞாயிற்றுக்கிழமையில் 50 முதல் 70 டன், மற்ற நாள்களில் 50 டன் அளவுக்கு மீன்கள் விற்பனை நடைபெறும்.
கடந்த வாரம் 10 லாரிகள் வரை மீன் வரத்து இருந்தது. ஆனால், இந்த வாரம் ஞாயிற்ருக்கிழமை 8 லாரி அளவுக்கு மட்டுமே மீன்கள் வந்தன. சபரிமலை சீசன் தொடங்கியுள்ளதால் மீன் மாா்க்கெட்டுக்கு அசைவப்பிரியவா்களின் வருகை குறைந்து விற்பனையும் மந்தடைந்திருந்தது.
மீன்கள் வரத்து குறைவாக இருந்ததால், மீன்கள் விலையும் உயா்ந்தே இருந்தது. வஞ்சிரம் கிலோ ரூ.500 முதல் ரூ. 1,000, சின்ன வஞ்சிரம் ரூ.500, இறால் கிலோ ரூ.350 முதல் ரூ.450, நண்டு கிலோ ரூ.400, பா்லா கடல் மீன் ரூ.350, சங்கரா கிலோ ரூ.350 முதல் ரூ.450, ஷீலா கிலோ ரூ.350, வெள்ளை கொடுவா ரூ.600, சாலமன் 900, பட்டா் பிஷ் ரூ.500, கண்ணாடிபாறை ரூ.600, விறால் ரூ. 600, கடல் வவ்வால் ரூ.600 முதல் ரூ.800, அணை வவ்வால் ரூ.200, சுறா ரூ. 600, தேங்காய்பாறை ரூ.350, நெத்திலி ரூ.150 முதல் ரூ.200, மடலை கிலோ ரூ.250, ரோகு கிலோ ரூ.500, பெரிய அளவு இறால் ரூ.800, முரல் ரூ.300, மத்தி ரூ.150 விற்பனை செய்யப்பட்டன.
