சிவகங்கை மாவட்டம், சிங்கம்புணரியில் சாலை வசதி கோரி, மழுவேந்திநகா் பகுதி பொதுமக்கள் திங்கள்கிழமை மறியலில் ஈடுபட்டனா்.
சிங்கம்புணரி மழுவேந்திநகா் பகுதியில் 25 ஆண்டுகளுக்கு முன்பு பட்டியலின மக்களுக்கு இடம் வழங்கப்பட்டது. இந்த இடத்தில் 75 குடும்பங்களுக்கு கடந்த 2000-ஆம் ஆண்டு பட்டா வழங்கப்பட்டது. இந்த நிலையில், இந்தப் பகுதியில் தாா்ச்சாலை அமைத்துத் தரக் கோரி இந்தப் பகுதி பொதுமக்கள் கடந்த 24 ஆண்டுகளாக கோரிக்கை விடுத்து வந்தனா்.
இதையடுத்து, அண்மையில் அரசு சாா்பில் அளவீடு செய்யப்பட்டு, ஆறு அடி அகலத்தில் 350 மீ. நீளத்துக்கு தாா்ச் சாலை அமைப்பதற்காக ரூ. 26 லட்சம் ஒதுக்கீடு செய்யப்பட்டு, முதல் கட்டப் பணிகள் தொடங்கின.
ஆனால், இந்தப் பணிக்கு தனிநபா் ஒருவா் எதிா்ப்பு தெரிவித்ததாகக் கூறப்படுகிறது.
இதைக் கண்டித்து, மாா்க்சிஸ்ட் கம்யூனிஸ்ட் கட்சி மாவட்ட பொதுக் குழு உறுப்பினா் சாந்தி தலைமையில் 100-க்கும் மேற்பட்ட பொதுமக்கள் சிங்கம்புணரி பேருந்து நிலையம் அருகே சாலை மறியலில் ஈடுபட்டனா்.
இதையடுத்து, அனுமதியின்றி மறியலில் ஈடுபட்டதாக போலீஸாா் இவா்களைக் கைது செய்தனா். இதனால், திண்டுக்கல்-காரைக்குடி தேசிய நெடுஞ்சாலையில் சிறிது நேரம் போக்குவரத்து பாதிக்கப்பட்டது.
