தொடரும் இஸ்ரேல் தாக்குதல்: லெபனானில் 34 பேர் பலி; 84 பேர் காயம்
பல்லடம் அருகே சிதிலமடைந்த தொகுப்பு வீட்டில் ஆதரவின்றி தவித்து வரும் 90 வயது முதியவருக்கு உதவ அரசு முன்வர வேண்டும் என்ற கோரிக்கை எழுந்துள்ளது.
திருப்பூா் மாவட்டம், பல்லடம் ஒன்றியம், கரைப்புதூா் ஊராட்சி ஏ.டி. காலனியில் வசித்து வருபவா் சின்னான் (90). இவா் கடந்த 30 ஆண்டுகளாக கரைப்புதூா் ஊராட்சியில் ஒப்பந்த அடிப்படையில் தூய்மைப் பணியாளராக மாதம் ரூ.2 ஆயிரம் ஊதியத்தில் பணியாற்றி வந்தாா்.
இவரது மனைவி கருப்பாள், மகள் தங்காள் ஆகியோா் கடந்த சில ஆண்டுகளுக்கு முன்பு இறந்துவிட்டனா். இதையடுத்து, ஆதரவின்றி வசித்து வரும் சின்னான், வயது மூப்பு காரணமாக பணி செய்ய முடியாத நிலையில், அவருக்கு கடந்த ஆண்டு வரை கரைப்புதூா் ஊராட்சித் தலைவா் ஜெயந்தி கோவிந்தராஜ் தனது சொந்த நிதியில் உதவி செய்து வந்தாா். இருப்பினும் தன்னால் முடிந்த பணிகளில் சின்னான் தொடா்ந்து ஈடுபட்டு வந்தாா். தற்போது, உடல்நலம் குன்றிய நிலையில் பணிகளில் ஈடுபட முடியாத நிலையில் அரசால் பல ஆண்டுகளுக்கு முன்பு கட்டிக் கொடுக்கப்பட்ட தொகுப்பு வீட்டில் வசித்து வருகிறாா்.
அவா் வசித்துவரும் தொகுப்பு வீடு சிதிலமடைந்து ஆபத்தான நிலையில் உள்ளது. மேலும், குடும்ப அட்டை இருந்தும் கைரேகை சரியாக பதிவாகாததால் அரிசி உள்ளிட்ட ரேஷன் பொருள்கள் கிடைப்பதில் சிக்கல் ஏற்பட்டுள்ளது. முதியோா் உதவித்தொகையும் கிடைக்காததால் அருகே வசிப்பவா்கள் கொடுக்கும் அரிசி உள்ளிட்ட உணவுப் பொருள்களை கொண்டு தானே சமைத்து சாப்பிட்டு வருகிறாா்.
எனவே சிதிலமடைந்த வீட்டை சீரமைத்து, ரேஷனில் உணவுப் பொருள், முதியோா் உதவித்தொகை கிடைக்க மாவட்ட நிா்வாகம் நடவடிக்கை எடுக்க வேண்டும் என சின்னான் கோரிக்கை விடுத்துள்ளாா்.
