சென்னை துறைமுகத்தில் கன்டெய்னா் திருட்டு: மேலும் 2 போ் கைது

சென்னை துறைமுகத்தில் ரூ.35 கோடி மதிப்பிலான எலக்ட்ரானிக் பொருள்கள் அடங்கிய கன்டெய்னா் திருடு போன சம்பவத்தில், மேலும் 2 பேரை போலீஸாா் கைது செய்தனா்.

கா்நாடக மாநிலம் பெங்களூரைச் சோ்ந்த ஒரு பிரபல தனியாா் நிறுவனத்துக்கு சீனாவிலிருந்து லேப்டாப் உள்ளிட்ட எலக்ட்ரானிக் பொருள்கள் அடங்கிய கன்டெய்னா் கடந்த செப்.7-ஆம் தேதி சென்னை துறைமுகத்துக்கு வந்தது. ஆனால், இந்த கன்டெய்னரைக் காணவில்லை என சரக்குகளை கைமாற்றும் நிறுவனம் துறைமுகம் காவல் நிலையத்தில் புகாரளித்தது.

தொடா்ந்து, போலீஸாா் நடத்திய விசாரணையில், திருவள்ளூரில் பதுக்கி வைக்கப்பட்டிருந்த கன்டெய்னரை மீட்டு, லாரி உரிமையாளா் திருவள்ளூா் மணிகண்டன்(30), இடைத்தரகா்கள் ராஜேஷ் (39), நெப்போலியன் (46), சிவபாலன் (46), திண்டுக்கல் முத்துராஜ் (46) மற்றும் லாரி ஓட்டுநா் விழுப்புரம் பால்ராஜ் (32) ஆகிய 6 பேரைக் கைது செய்து சிறையில் அடைத்தனா்.

இந்நிலையில், இந்த வழக்கில் தலைமறைவாக இருந்த சரக்குகளைக் கையாளும் நிறுவன ஊழியா் இளவரசன் மற்றும் இடைத்தரகரான தண்டையாா் பேட்டையைச் சோ்ந்த சென்னை மாநகா் போக்குவரத்துக் கழக ஓட்டுநா் சங்கரன் (56) ஆகியோரை போலீஸாா் சனிக்கிழமை கைது செய்தனா். இந்த வழக்கில் தொடா்புடைய மேலும் சிலரை போலீஸாா் தேடி வருகின்றனா்.