ஜாமியா மில்லியா பல்கலைக்கழகத்தில் இரு தரப்பு மாணவா்கள் கைகலப்பு

தில்லியில் ஜாமியா மில்லியா இஸ்லாமியா பல்கலைக்கழகத்தில் தீபாவளி கொண்டாட்டத்தின் போது இரு தரப்பைச் சோ்ந்த மாணவா்கள் இடையே கைகலப்பு ஏற்பட்டது.

இதைத் தொடா்ந்து, முன்னெச்சரிக்கை நடவடிக்கையாகவளாகத்திற்கு வெளியே போலீஸாா் பாதுகாப்புப் பணியில் ஈடுபடுத்தப்பட்டனா்.

செவ்வாய்கிழமை இரவு நிகழ்ந்த இச்சம்பவம் தொடா்பாக புகாா் ஏதும் காவல் துறைக்கு வரவில்லை என்று போலீஸாா் தெரிவித்தனா்.

தீபாவளி நிகழ்ச்சி அகில பாரதிய வித்யாா்த்தி பரிஷத் அமைப்பின் ராஷ்ட்ரீய கலா மஞ்ச் (ஆா்கேஎம்) மூலம் ஏற்பாடு செய்யப்பட்டிருந்தது. இதுகுறித்து ஏபிவிபி கூறுகையில், தீப மஹோத்ஸவம் மீண்டும் புதன்கிழமை மாலை நடத்தப்படும் என்று தெரிவித்தது.

இதுகுறித்து தில்லி காவல் துறையின் உயா் அதிகாரி கூறியதாவது:

மாணவா்கள் சிலா் தீபாவளி கொண்டாட்டத்தை மேற்கொண்டபோது மற்றொரு தரப்பு மாணவா்கள் இடையூறு செய்ததாக கைகலப்பு ஏற்பட்டது.

இதையடுத்து, பல்கலைக்கழக பாதுகாப்பு அதிகாரிகளின் தலையீட்டைத் தொடா்ந்து நிலைமை கட்டுக்குள் கொண்டுவரப்பட்டு மாணவா்கள் கலைந்துசென்றனா்.

மாணவா்கள் பல்கலைக்கழக வளாகத்திற்குள் ‘வகுப்புவாத’ கோஷங்களை எழுப்பியதாகக் கூறப்படும் விடியோக்கள் சமூக ஊடகங்களில் பரவியது.

பல்கலைக்கழகத்திற்குள் பதற்றம் இருப்பதாக தகவல் கிடைத்தது. இதையடுத்து, முன்னெச்சரிக்கை நடவடிக்கையாக பல்கலைக்கழக வாயிலுக்கு முன் உள்ள வளாகத்தை சுற்றிலும் போலீஸாா் குவிக்கப்பட்டுள்ளனா் என்றாா்.

மற்றொரு மூத்த அதிகாரி கூறுகையில், பல்கலைக்கழக வளாகப் பகுதியில் காவல் கண்காணிப்பை அதிகரிக்குமாறு உள்ளூா் போலீஸாரிடம் கேட்டுக் கொள்ளப்பட்டுள்ளதாக தெரிவித்தாா்.

ஏபிவிபி தேசிய ஊடக அமைப்பாளா் ஆஷுதோஷ் சிங் கூறுகையில், ‘‘கல்வி நிறுவனங்கள் அனைத்து விழாக்களையும் கொண்டாட திறக்கப்பட வேண்டும். வளாகத்தில் இஃப்தாா் விருந்து ஏற்பாடு செய்ய முடியுமானால், தீபாவளி கொண்டாட்டங்களையும் அனுமதிக்க வேண்டும். நாங்கள் நிகழ்ச்சிக்கு மேற்பாா்வையாளா் அலுவலகத்தில் இருந்து அனுமதி பெற்றிருந்தோம் (செவ்வாய்கிழமை மாலை நடைபெற்ற நிகழ்ச்சி).

முஸ்லிம்கள் உள்பட இதர மாணவா்களும் எங்களுடன் கொண்டாடினா். ஆனால் சில தீவிர சிந்தனைகொண்ட சக்திகள் அங்கு வந்து அவா்களை உடல் ரீதியாக தாக்கினா்.

இப்பிரச்னையின் உணா்வுபூா்வ தன்மையைக் கருத்தில்கொண்டு, வன்முறையைத் தடுக்க பல்கலைக்கழகம் எந்த நடவடிக்கையும் எடுக்கவில்லை. இது தொடா்பாக ஏபிவிபி காவல்துறையில் புகாா் அளிக்கவுள்ளது’’ என்றாா் அவா்.

இந்த விவகாரம் தொடா்பாக பல்கலைக்கழகத் துணைவேந்தா் முகம்மது ஷகீல் தரப்பில் உடனடியாக பதில் ஏதும் தெரிவிக்கப்படவில்லை.