தில்லி மக்கள் எச்சரிக்கையாக இருக்க வேண்டும் -சட்டப்பேரவைத் தலைவா் வலியுறுத்தல்

தலைநகா் தில்லியில் சட்டம்-ஒழுங்கு சீா்குலைந்துள்ளதால் பொதுமக்கள் எச்சரிக்கையுடன் இருக்க வேண்டும் என்று தில்லி சட்டப்பேரவைத் தலைவா் ராம்நிவாஸ் கோயல் புதன்கிழமை வலியுறுத்தியுள்ளாா்.

இது தொடா்பாக அவா் ‘எக்ஸ்’ சமூக வலைத்தளத்தில் கூறியுள்ளதாவது: தில்லி சட்டப்பேரவையின் தலைவா் என்ற

முறையில், தில்லியில் சீா்குலைந்துள்ள சட்டம்-ஒழுங்கு நிலை குறித்து பொது மக்களுக்கு எச்சரிக்கை செய்ய வேண்டியது

எனது கடமை. பண்டிகைக் காலம் வருவதால் மக்கள்அனைவரும் கூடுதல் எச்சரிக்கையாக இருக்க வேண்டிய நிலை ஏற்பட்டுள்ளது.

தில்லியில் சட்டம்-ஒழுங்கு சீா்குலைந்துள்ள நிலையில், மத்திய அரசு கண்ணை மூடிக்கொண்டுள்ளது. தில்லியில் கடந்த 4 மாதங்களாக குண்டா் கும்பல்களின் சண்டை நடந்து வரும் நிலையில், பல இடங்களில் துப்பாக்கி சூடு நடத்தப்பட்டது.

நாளிதழ்களின் பக்கங்கள் இந்தச் செய்திகளால் நிரம்பி வழிகின்றன. பெண்களுக்கு எதிரான குற்றங்கள் தொடா்ந்து அதிகரித்து வருகின்றன.

தில்லி வெல்கம் காலனியில் 60 சுற்றுகள் வரை தோட்டாக்கள் சுடப்பட்டதில் பெண் ஒருவா் உயிரிழந்தாா். ரோகினியில் நடந்த குண்டுவெடிப்பு சம்பவத்தில், சிஆா்பிஎஃப் பள்ளியின் சுவரில் பெரிய ஓட்டை உருவாகியிருப்பது மிகவும்

வருத்தமளிக்கும் சம்பவம். நாட்டின் பல்வேறு மாநிலங்களிலும் இதே நிலைதான் அதிகமாகவோ அல்லது குறைவாகவோ உள்ளது.

மும்பை சம்பவம் ஒரு சமீபத்திய உதாரணம். அதிகரித்து வரும் இந்த சம்பவங்களை மனதில் கொண்டு, மத்திய அரசு

கண்களை மூடிக்கொண்டு தூங்குவதால், பொதுமக்கள் மிகவும் எச்சரிக்கையாக இருக்க வேண்டும். நீங்கள் உங்களை கவனித்துக் கொள்ள வேண்டும். இறைவனின் அருளால் நாம் அனைவரும் பாதுகாப்பாக இருப்போம். நன்றி என்று ராம்நிவாஸ் கோயல் தெரிவித்துள்ளாா்.