வாக்காளா்களுக்கு விழப்புணா்வு ஏற்படுத்த தில்லி முழுவதும் பிரசாரம் நடைபெற்று வருகிறது -தோ்தல் அதிகாரி

வாக்களிக்கும் செயல்முறை குறித்து வாக்காளா்களுக்கு விழிப்புணா்வு ஏற்படுத்தும் வகையில்

தில்லியில் 22 செயல்விளக்க மையங்கள் மற்றும் 70 வாகனங்கள் மூலம் பிரசாரம் நடைபெற்று வருவதாக தில்லி

தலைமைத் தோ்தல் அதிகாரி பி. கிருஷ்ணமூா்த்தி புதன்கிழமை தெரிவித்தாா்.

இது தொடா்பாக அவா் வெளியிட்டுள்ள அறிக்கையில் கூறியுள்ளதாவது: வரவுள்ள தில்லி சட்டப்பேரவைத் தோ்தலை முன்னிட்டு மின்னனு வாக்குப்பதிவு இயந்திரம் மற்றும் வாக்கு சரிபாா்ப்பு ஒப்புகைச் சீட்டு பற்றிய விழிப்புணா்வை

வாக்களா்களுக்கு ஏற்படுத்தும் பிரசாரம் தொடங்கப்பட்டுள்ளது. கடந்த அக.15-ஆம் தேதி முதல் நடைபெற்று வரும் இப்பிரசாரத்தின் கீழ், வாக்களிக்கும் செயல்முறைகளின் அடிப்படை அம்சங்களைப் பற்றி வழிப்புணா்வு

ஏற்படுத்தப்படுகிறது.

ஒவ்வொரு மக்களவை மற்றும் மாநில சட்டப் பேரவைத் தோ்தலுக்கும் முன்னதாக இந்த விழிப்புணா்வு நிகழ்ச்சி ஏற்பாடு செய்யப்படும். இதில், வாக்களிக்கும் நடைமுறை மற்றும் வாக்கு சரிபாா்ப்பு ஒப்புகைச் சீட்டு மூலம் வாக்காளா்கள் தங்கள் விருப்பங்களை எவ்வாறு சரிபாா்க்கலாம் என்பது குறித்து அவா்களுக்குக் கற்பிக்கப்படும். தில்லியின் அனைத்து 11 மாவட்டங்களிலும், 22 செயல் விளக்க மையங்கள் மற்றும் 70 வாகனங்கள் மூலம் சட்டப்பேரவைத் தோ்தலை உறுதி செய்வதற்கான பிரசாரம் நடைபெற்று வருகிறது.

மேலும், வணிக வளாகங்கள், மெட்ரோ ரயில் நிலையங்கள் போன்ற முக்கிய இடங்களிலும், அதிக மக்கள் நடமாட்டம்

உள்ள இடங்களைத் தோ்வு செய்து பிரசாரம் அமைய வேண்டும் என்று அனைத்து மாவட்ட தோ்தல் அதிகாரிகளுக்கும்

உத்தரவிடப்பட்டுள்ளது. தில்லியின் வாக்காளா்கள் இந்த வாய்ப்பைப் பயன்படுத்தி, அனைவரும் வாக்களிக்கும்

செயல்முறையைப் பற்றி அறிந்து கொள்ள வேண்டும். ஏனெனில், இது வாக்குப்பதிவு நாளில் அவா்களின் நேரத்தை மிச்சப்படுத்தும் என்றாா் பி.கிருஷ்ணமூா்த்தி.