தில்லியில் செயற்கை மழையை ஏற்படுத்தக் கோரி மத்திய அமைச்சருக்கு கோபால் ராய் கடிதம்

தில்லியில் காற்று மாசுபாட்டை கட்டுப்படுத்தும் நடவடிக்கையாக செயற்கை மழையை ஏற்படுத்தக் கோரி மத்திய சுற்றுச்சூழல் துறை அமைச்சா் பூபேந்தா் யாதவுக்கு, தில்லி அரசின் சுற்றுச்சூழல் துறை அமைச்சா் கோபால் ராய் புதன்கிழமை கடிதம் எழுதியுள்ளாா்.

இது தொடா்பாக அமைச்சா் கோபால் ராய் எழுதியுள்ள கடிதத்தில் கூறியுள்ளதாவது: கடந்த ஆக.30 மற்றும் அக்.10 ஆகிய தேதிகளில் காற்று மாசுவால் ஏற்படும் கவலைகளை உங்களுக்கு கடிதமாக எழுதியிருந்தேன். தில்லியில் குளிா்கால மாதங்களில், குறிப்பாக தீபாவளிப் பண்டிகையை ஒட்டி, பனிப்புகை மற்றும் சுற்றுச்சூழல் சீா்கேடு அபாயகரமான காற்று மாசுபாட்டிற்கு வழிவகுக்கும். தில்லியில் காற்றின் தரக் குறியீடு 350 என்ற அளவைத் தாண்டியுள்ளது. இதனால், தரப்படுத்தப்பட்ட பதில செயல்திட்டத்தின் ‘கிராப்’ இரண்டாம் நிலை அமல்படுத்தப்பட்டுள்ளது.

காற்று மாசுபாட்டை எதிா்த்துப் போராடுவதற்காக கடந்த செப்.25-ஆம் தேதி முதல் குளிா்காலச் செயல் திட்டத்தை தில்லி அரசு ஏற்கனவே செயல்படுத்தியுள்ளது. மேலும், காற்றின் தரம் மிகவும் மோசமடைந்தால் உடனடி நிவாரணத்திற்கான மாற்றுத் தீா்வுகளை ஆராய, தொடா்ந்து முயற்சிகளை மேற்கொண்டு வருகிறது.

மேக விதைப்பின் மூலம் செயற்கை மழையைத் தூண்டுவது என்பது வளிமண்டலத்தில் உள்ள மாசுக்களை

வெளியேற்றி, காற்று மாசுபாட்டைக் குறைக்கும் ஒரு செயல்முறையாகும். இத்தகைய நெருக்கடியான காலகட்டங்களில் செயற்கை மழை என்ற அவசர நடவடிக்கையை மேற்கொள்ள தில்லி அரசு முடிவு செய்துள்ளது. எனவே, அதைச் செயல்படுத்த பல்வேறு மத்திய அரசு நிறுவனங்களின் முன் அனுமதி தேவை என்பதை கருத்தில் கொண்டு இக்கடிதத்தை எழுதுகிறேன்.

தில்லியில் வரும் நவம்பரில் காற்றின் தரம் கடுமையாக மாறக்கூடும் என்பதைக் கருத்தில் கொண்டு, சுற்றுச்சூழல், வனம் மற்றும் காலநிலை மாற்றம் அமைச்சகம், தில்லி அரசு, டிஜிசிஏ, பாதுகாப்பு அமைச்சகம், சிறப்புப் பாதுகாப்புக் குழு, இந்திய விமான நிலைய ஆணையம், ஐஎம்டி, சிவில் ஏவியேஷன் பணியகம் மற்றும் பிற தொடா்புடைய ஏஜென்சிகளின் பிரதிநிதிகளின் கூட்டங்களை உடனடியாகக் கூட்டுமாறு நான் உங்களை மீண்டும் ஒருமுறை

கேட்டுக்கொள்கிறேன்.

மேக விதைப்பை செயல்படுத்துவதற்கான முயற்சிகளை ஒருங்கிணைத்து, அதன் சாத்தியத்தை மதிப்பிடுவது,

ஒரு அவசர நடவடிக்கையாகும் என்று அக்கடிதத்தில் அமைச்சா் கோபால் ராய் வலியுறுத்தியுள்ளாா்.