திருநெல்வேலியில் தனியாா் நீட் பயிற்சி மையத்தில் உள்ள மாணவா்களை பயிற்சி ஆசிரியா்கள் தாக்கியது தொடா்பான விடியோ குறித்து மாநில மனித உரிமைகள் ஆணைய உறுப்பினா் கண்ணதாசன் வெள்ளிக்கிழமை விசாரணை நடத்தினாா்.
பின்னா் அவா் செய்தியாளா்களிடம் கூறியது:
தனியாா் நீட் பயிற்சி மையத்தில் மாணவா்களை பயிற்சி ஆசிரியா்கள் தாக்குவது போன்ற விடியோ காட்சி வெளியானது.
இதையடுத்து இந்த மையத்துக்குச் சென்று ஆய்வு செய்து, விசாரணை நடத்தினேன். இந்த மையத்தில் 80 மாணவா்கள் படித்து வருகின்றனா். இதில் ஏராளமான மாணவா்களை தாக்கியுள்ளனா். இதுகுறித்து காவல் நிலையத்தில் புகாா் தெரிவித்துள்ளனா். மேலும், 2 சிறாா்களையும் தாக்கியுள்ளனா். இந்த மனித உரிமை மீறல் சம்பவத்தை மாநில மனித உரிமைகள் ஆணையம் தாமாக முன்வந்து இந்த வழக்கை விசாரித்து நடவடிக்கை எடுக்கும்.
இதுகுறித்து விசாரித்து ஆணையத்துக்கு அறிக்கை அளிக்கும்படி போலீஸாருக்கு உத்தரவிட்டுள்ளேன். அந்த அறிக்கை வந்த பின் சட்டப்படி நடவடிக்கை மேற்கொள்ளப்படும் என்றாா் அவா்.