புது தில்லி: எல்லைத் தாண்டி மீன் பிடித்ததாக கூறி காரைக்கால் மீனவர்கள் 2 பேர் மீது இலங்கை கடற்படை துப்பாக்கிச் சூடு நடத்தியுள்ளதற்கு மத்திய அரசு, இலங்கைக்கு தனது கண்டனத்தைத் தெரிவித்துள்ளது.
கச்சத்தீவு அருகே நடுக்கடலில் மீன்பிடித்துக் கொண்டருந்த காரைக்கால் மீனவர்களை, எல்லைத் தாண்டி மீன் பிடித்ததாக கூறி 13 பேர் மீது துப்பாக்கிச் சூடு நடத்தி இலங்கை கடற்படை கைது செய்துள்ளது. இதில் 2 மீனவர்கள் படுகாயம் அடைந்தனர். கைது செய்யப்பட்ட 13 பேரும் காங்கேசன் துறை கடற்படை முகாமுக்கு கொண்டு செல்லப்பட்டதாகவும் தகவல்கள் வெளியாகின.
இந்த நிலையில், எத்தகைய சூழலிலும் இந்திய மீனவர்கள் மீது தனது படை பலத்தை இலங்கை பயன்படுத்துவதை ஏற்க முடியாது என்று மத்திய அரசு கடும் கண்டனத்தைப் பதிவு செய்திருக்கிறது.
வாழ்வாதார பிரச்னை என்பதால் மனிதாபிமான முறையில் மீனவர்கள் பிரச்னையை கையாள வேண்டும் என்றே மத்திய அரசு வலியுறுத்துகிறது என்றும் தெரிவிக்கப்பட்டுள்ளது.
தமிழகத்தின் காரைக்கால் பகுதியைச் சேர்ந்த மீனவர்கள் 13 பேரை துப்பாக்கிச் சூடு நடத்தி இலங்கை கடற்படை கைது செய்த சம்பவத்தில் மீனவர்களில் இருவருக்கு படுகாயம் ஏற்பட்டுள்ளதாகவும், மூவருக்கு சிறு காயம் ஏற்பட்டுள்ளதாகவும் கூறப்படுகிறது.
காயமடைந்த மீனவர்களை, காங்கேசம் பகுதிக்குச் சென்று இந்திய துணைத் தூதரக அதிகாரிகள் நேரில் சந்தித்து அவர்களது உடல்நலன் குறித்து விசாரித்துள்ளதாகவும், தமிழக மீனவர்கள் மீதான இலங்கையின் துப்பாக்கிச் சூடு சம்பவத்துக்கு இந்தியா தரப்பில் கடும் கண்டனம் தெரிவிக்கப்பட்டுள்ளது.
அதாவது, தில்லியில் இலங்கை தூதரை நேரில் அழைத்து கண்டனம் தெரிவிக்கப்பட்டுள்ளதாகவும், கொழும்புவில் உள்ள தூதரகம் வாயிலாகவும் இந்தியா தனது கண்டனத்தை இலங்கையிடம் தெரிவித்துள்ளதாகவும் மத்திய அரசு தெரிவித்துள்ளது.
