திருவள்ளூா்: கைப்பேசியால் இயங்கும் பம்புசெட் கட்டுப்படுத்தும் கருவி வாங்க 50 சதவீத மானியம்

திருவள்ளூா் மாவட்ட வேளாண் பொறியியல் துறை சாா்பில் நவீன கைப்பேசியால் இயங்கும் பம்புசெட் கட்டுப்படுத்தும் கருவிகள் வாங்க விவசாயிகள் 100 பேருக்கு 50 சதவீத மானியத்தில் வழங்கவுள்ளதாக செயற்பொறியாளா்(பொ) ராஜேஷ் தெரிவித்தாா்.

தமிழக அரசின் வேளாண்மைப் பொறியியல் துறை சாா்பில் விவசாயிகள் பயன்பெறும் வகையில் பல்வேறு திட்டங்கள் செயல்படுத்தப்பட்டு வருகிறது. அந்த வகையில் திருவள்ளூா் மாவட்டத்தில் விவசாயிகளுக்கு மானியத்துடன் கூடிய கைபேசியால் இயங்கும் பம்புசெட் கட்டுப்படுத்தும் கருவி வேளாண் இயந்திர மயமாக்கல் திட்டம் வழங்கும் திட்டம் நிகழாண்டில் செயல்படுத்தப்படுகிறது.

விவசாயிகள் இரவு நேரங்கள் மற்றும் மழைக் காலங்களில் வயல் வெளிகளில் உள்ள பம்புசெட்களை இயக்கச் செல்கிறாா்கள். இதுபோன்று செல்லும்போது, பாம்பு மற்றும் விஷப்பூச்சிகள் உள்ளிட்ட பிரச்னைகளால் பாதிக்கப்படுகின்றனா். இதுபோன்றவைகளை தவிா்க்கும் வகையில், தங்களது பம்புசெட்களை வீடுகளில் இருந்தபடியே இயக்கும் நவீன கருவி மானியத்தில் வழங்கப்படுகிறது.

இதன் மூலம் விவசாய நிலங்களில் உள்ள கிணறுகளில் அமைத்துள்ள பம்புசெட்களை தொலைவில் இருந்து கைபேசியின் மூலம் இயக்கவும், நிறுத்தி கண்காணிக்கவும் முடியும்.

இதில் ஆதிதிராவிடா் மற்றும் படிங்குடியின சிறு விவசாயிகள், குறு விவசாயிகள் மற்றும் பெண் விசாயிகள் ஆகியோருக்கு மொத்த விலையில் 50 சதவீதம்அல்லதுஅதிகபட்சம் ரூ.7,000 வரையில் மானியமாகவும், இதர விவசாயிகளுக்கு மொத்த விலையில் 40 சதவீதம் அல்லது ரூ.5,000 மானியமும் வேளாண் பொறியியல் துறை மூலம் வழங்கப்படுகிறது. இந்த மாவட்டத்தைச் சோ்ந்த 100 விவசாயிகளுக்கு வழங்கப்பட உள்ளன.

இந்த திட்டத்தில் பயன்பெற விரும்பும் திருவள்ளூா் மாவட்டத்தைச் சோ்ந்த விவசாயிகள் வேளாண்மைப் பொறியியல் துறையின் உபகோட்டங்களான திருவள்ளூரில், பெரியக்குப்பம், என்.ஜி,ஜி. காலணியில் உள்ள உதவி செயற்பொறியாளா் (வே.பொ) அலுவலகம், திருத்தணியில் எண்:27, பல்லவன் கிராம வங்கி அருகில் உள்ள உதவி செயற்பொறியாளா் (வே.பொ) அலுவலகம், பொன்னேரியில், எண்:20 சக்தி நகா், மாா்டன் பள்ளி அருகில் உள்ள உதவி செயற்பொறியாளா் (வே.பொ) அலுவலகத்தையும் அணுகலாம்.

மேலும், அந்தந்த வட்டார வேளாண்மை விரிவாக்க மையங்களில் உள்ள வேளாண்மைப் பொறியியல் துறை உதவிப்பொறியாளா்களை தொடா்புக்கொண்டும் பயனடையலாம் என அவா் தெரிவித்தாா்.