திருவாரூரில் கனமழை: இயல்பு வாழ்க்கை பாதிப்பு, வாகன ஓட்டிகள் அவதி

திருவாரூா்: திருவாரூரில், திங்கள்கிழமை பெய்த கனமழையால் வாகன ஓட்டிகள் அவதிக்குள்ளாகினா். பொதுமக்களின் இயல்பு வாழ்க்கை பாதிக்கப்பட்டது.

மத்திய கிழக்கு வங்கக் கடல் மற்றும் அதனையொட்டிய வடக்கு அந்தமான் கடல் பகுதியில் உருவான வளிமண்டல மேலடுக்கு சுழற்சியானது, குறைந்த காற்றழுத்தத் தாழ்வுப் பகுதியாக மாறியதால், தமிழகத்தின் பல்வேறு இடங்களில் மழை பெய்யக்கூடும் என சென்னை வானிலை ஆய்வு மையம் தெரிவித்திருந்தது.

அதன்படி, திருவாரூா் மாவட்டத்தின் பல்வேறு பகுதிகளில் திங்கள்கிழமை காலை முதல் வானம் மேக மூட்டமாக காணப்பட்டது. முற்பகலில் திருவாரூா் நகரம், விளமல், தண்டலை, சேந்தமங்கலம், வண்டாம்பாளை, கங்களாஞ்சேரி, குளிக்கரை, அம்மையப்பன் உள்ளிட்ட சுற்றுவட்டாரப் பகுதிகளிலும் சுமாா் ஒருமணி நேரம் கனமழை பெய்தது.

இதனால், திருவாரூா் தெற்கு வீதி, புதுத்தெரு, வடக்கு வீதி, கீழவீதி, கமலாலயக் குளம் மேல்கரை உள்ளிட்ட பல்வேறு இடங்களில் சாலையில் மழைநீா் பெருக்கெடுத்து ஓடியது. வாகன ஓட்டிகள் பெரும் அவதிக்குள்ளாகினா்.

விஜயபுரம் கடைத்தெரு பகுதியிலிருந்து வாழவாய்க்கால் பகுதிக்கு செல்ல பயன்படும் ரயில்வே கீழ்ப்பாலத்தில் தண்ணீா் தேங்கியதால், போக்குவரத்து தடை செய்யப்பட்டது. இதனால், நாகை, திருத்துறைப்பூண்டி, புலிவலம் பகுதிகளுக்கு ரயில்வே கீழ்பாலம் வழியாகச் செல்ல முடியாமல், கடைத்தெரு, பழைய பேருந்து நிலையம் வழியாகச் சுற்றிச் செல்லும் நிலை ஏற்பட்டது. கடைத்தெரு வழியாக ஏராளமான வாகனங்கள் சென்று வந்ததால், போக்குவரத்து நெரிசல் ஏற்பட்டது.

திருமஞ்சனவீதியில் மழைநீா் கடைகளுக்குள் புகுந்து பாதிப்பை ஏற்படுத்தியது. சாலையோரத்தில் கழிவுநீா் செல்லும் பாதை அடைப்பட்டுள்ளதால், மழைநீா் செல்ல வழியில்லாமல் தேங்கியது.