தேசிய குழந்தைகள் தினத்தையொட்டி வேலூரில் குழந்தைகள் பாதுகாப்பு குறித்த விழிப்புணா்வு பேரணி நடைபெற்றது.
தேசிய குழந்தைகள் தினத்தையொட்டி மாவட்ட குழந்தைகள் பாதுகாப்பு அலகின் சாா்பில் குழந்தைகளுக்கான நடைப்பயணம் விழிப்புணா்வு பேரணி வேலூரில் வியாழக்கிழமை நடைபெற்றது. பேரணியை மாவட்ட ஆட்சியா் வி.ஆா்.சுப்புலட்சுமி கொடியசைத்து தொடங்கி வைத்து, பொதுமக்களிடம் குழந்தைகள் பாதுகாப்பு விழிப்புணா்வு துண்டுப் பிரசுரங்களை வழங்கினாா்.
மாவட்ட ஆட்சியா் அலுவலக வளாகத்தில் தொடங்கிய இந்த பேரணி சத்துவாச்சாரி காந்தி நகா் மேம்பாலம் வழியாக சத்துவாச்சாரி ஆஞ்சனேயா் சிலை வரை நடைபெற்றது.
பேரணியில் நாராயணி செவிலியா் பயிற்சி கல்லூரி மாணவா்கள், குழந்தைகள் பாதுகாப்பு அலகு பணியாளா்கள் பங்கேற்று குழந்தைகள் பாதுகாப்பு விழிப்புணா்வு பதாகைகளை ஏந்திச் சென்றனா்.
முன்னதாக, மாவட்ட ஆட்சியா் தலைமையில் அனைவரும் தேசிய குழந்தைகள் தின உறுதிமொழியை ஏற்றுக் கொண்டனா். இந்தப் பேரணியில் மாவட்ட குழந்தைகள் பாதுகாப்பு அலுவலா் சஞ்ஜீத், மாவட்ட சமூக நல அலுவலா் உமா, மாவட்ட ஆட்சியா் அலுவலக மேலாளா் (பொது) சரவணன், குழந்தைகள் நலக்குழுமம் தலைவா் வேதநாயகம், நன்னடத்தை அலுவலா் ஏகாம்பரம் உள்ளிட்டோா் பங்கேற்றனா்.
