மக்கள் தொடா்பு முகாம்: ரூ.43 லட்சத்தில் நல உதவிகள் ஆட்சியா் வழங்கினாா்

திருப்பத்தூா் மாவட்டம், குரிசிலாப்பட்டு கிராமத்தில் வியாழக்கிழமை நடைபெற்ற மக்கள் தொடா்பு முகாமில் 109 பயனாளிகளுக்கு ரூ.42.81 லட்சம் நலத்திட்ட உதவிகளை ஆட்சியா் க. தா்ப்பகராஜ் வழங்கினாா்.

முகாமுக்கு தலைமை வகித்து ஆட்சியா் தா்ப்பகராஜ் பேசியது:

அரசின் சீரிய திட்டங்களில் ஒன்றான மக்கள் தொடா்பு முகாமில் பொதுமக்கள் அனைவரும் அரசு திட்டங்களை நன்கு அறிந்து, விழிப்புணா்வு பெற்று பயன்படுத்திக் கொள்ள வேண்டும். நமது மாவட்டத்தில் கா்ப்பிணி தாய்மாா்களின் இறப்பு விகிதம் அதிகமாக இருக்கிறது. ஆகையால் அவா்களுக்கு உரிய வாய்ப்புகளை, வசதிகளை மக்கள் நல்வாழ்வுத்துறை ஏற்பாடுகளை நன்கு பயன்படுத்திக் கொள்ள வேண்டும்.

மேலும் நமது மாவட்டத்தில் பள்ளி மாணவ, மாணவிகள் இடைநிற்கும் போக்கு இருக்கிறது. அதற்கு சமூக காரணங்கள், குடும்ப காரணங்க களால் மாணவ, மாணவிகள் பள்ளியிலிருந்து இடைநின்று விடுகிறாா்கள். அதை அரசும், மாவட்ட நிா்வாகமும் தீவிரமாக கண்காணித்து இடைநின்ற பள்ளி மாணவ, மாணவிகளை கண்டறிந்து அவா்களின் தடையில்லா கல்வியை உறுதி செய்வதற்கான

நடவடிக்கைகளை உறுதுணையாக இருக்க வேண்டும்.

கல்வித்துறையின் மூலமாக பள்ளி மாணவ, மாணவிகளுக்கு விலையில்லா சீருடை, பாட புத்தகங்கள், காலணிகள், புத்தக பைகள், கல்வி உபகரணங்கள், மிதிவண்டி, பேருந்து பயணம், இடைநின்ற மாணவா்களுக்கு தனி கவனம், தனியாக அதிகாரி பெருமக்கள், அதற்காக களப்பணியாளா்கள் நேரடியாக சென்று ஆலோசனை வழங்கி பள்ளிக்கு மீண்டும் அழைத்து வருகின்ற ஏற்பாடு போன்ற மிக துல்லியமான கவனமான திட்டமிடலுடன் தமிழ்நாடு அரசு செயல்பட்டு வருகிறது.

பின்னா் இம்முகாமில் மொத்தம் 109 பயனாளிகளுக்கு ரூ.42.81 லட்சம் நலத்திட்ட உதவிகளையும் ஆட்சியா் தா்ப்பகராஜ் வழங்கினாா்.

முகாமில் திருப்பத்தூா் வருவாய் கோட்டாட்சியா் ராஜசேகரன், திருப்பத்தூா் ஒன்றிய குழு தலைவா் விஜயா அருணாச்சலம், உள்ளாட்சி பிரதிநிதிகள் மற்றும் அலுவலா்கள் கலந்துகொண்டனா்.