தொடக்க கூட்டுறவு வங்கி பணியாளா்கள் வேலைநிறுத்தம்

நியாயவிலைக் கடை பணியாளா்களுக்கு அபராதத் தொகையை, இரு மடங்காக உயா்த்தியதற்கு எதிா்ப்பு தெரிவித்து தொடக்க கூட்டுறவு வங்கி பணியாளா்கள் திங்கள்கிழமை முதல் வேலைநிறுத்தத்தில் ஈடுபட்டு வருகின்றனா்.

தமிழ்நாடு மாநில தொடக்க கூட்டுறவு வங்கி அனைத்துப் பணியாளா்கள் சங்க நாமக்கல் மாவட்ட கிளை சாா்பில், ஆட்சியா், கூட்டுறவு சங்கங்களின் இணைப்பதிவாளா்களிடம் வேலைநிறுத்த கடிதத்தை வழங்கி, நாமக்கல்-மோகனூா் சாலை என்ஜிஜிஓ கட்டடம் முன்பு அச்சங்கத்தின் மாவட்டச் செயலாளா் பி.சிவசங்கரன் தலைமையில் கோரிக்கை முழக்க போராட்டத்தில் ஈடுபட்டனா்.

நாமக்கல் மாவட்டத்தில் உள்ள 169 தொடக்க வேளாண்மை கூட்டுறவு கடன் சங்கங்களில் பணியாற்றும் 350 பணியாளா்கள் இந்த வேலைநிறுத்தத்தில் பங்கேற்றுள்ளனா்.

மாநிலம் தழுவிய அளவில் நடைபெறும் இப்போராட்டத்தில், அரிசி, கோதுமை, துவரம் பருப்பு, பாமாயில் போன்றவை இருப்பு குறைவு, அதிகம் மற்றும் போலி பில் கண்டறியப்பட்டால், சம்பந்தப்பட்ட பணியாளா்களிடம் இருந்து வசூலிக்கப்பட்ட அபராதத் தொகை, தற்போது இரு மடங்காக உயா்த்தப்பட்டுள்ளது. இந்த உத்தரவை உடனடியாக ரத்து செய்ய வேண்டும்.

பொதுமக்களிடம் கட்டாயப்படுத்தி பொருள்களை விற்பனை செய்ய அதிகாரிகள் வலியுறுத்தக் கூடாது. புதியதாக நியமிக்கப்பட்ட பணியாளா்களை தொலைதூரத்தில் நியமித்திருப்பதை ரத்து செய்து, அருகில் உள்ள சங்கங்களில் பணியாற்ற அனுமதிக்க வேண்டும்.

காலிப் பணியிடங்களை நிரப்ப வேண்டும் என்பன உள்ளிட்ட கோரிக்கைகளை வலியுறுத்தி முழக்கங்கள் எழுப்பப்பட்டன.

இதில், சங்க நிா்வாகிகள் பி.சக்திவேல், இ.பாலமுருகன், கே.கருணாநிதி, சி.ராமமூா்த்தி உள்ளிட்ட பலா் கலந்து கொண்டனா்.