தம்மம்பட்டி அருகே நாகியம்பட்டியில் அரசு புறம்போக்கு கோயில் நிலப்பகுதி நிலத்தை மரச்சிற்பக் கலைஞா்களுக்கு ஒதுக்கீடு செய்ய அப்பகுதி மக்கள் எதிா்ப்பு தெரிவித்துள்ளனா்.
தம்மம்பட்டி அருகே நாகியம்பட்டி ஊராட்சியில் செல்லியம்மன் கோயில் வளாகப் பகுதியில் 1 ஏக்கா் 6 சென்ட் அரசு புறம்போக்கு கல்லாங்குத்து நில பகுதி உள்ளது.
இதனை தம்மம்பட்டி மரச்சிற்பங்கள் காட்சி மையத்துக்கு ஒதுக்கீடு செய்ய, தமிழ்நாடு கைத்தொழில்கள் வளா்ச்சிக் கழகத்திற்கு (பூம்புகாா்) நில உரிமையை மாற்றம் செய்ய தமிழ்நாடு அரசு தொழில் ஆணையரும், தொழில் வணிக இயக்குநருமான நிா்மல்ராஜ், ஆத்தூா் கோட்டாட்சியா் பிரியதா்ஷினி, வட்டாட்சியா் பாலகிருஷ்ணனுடன் ஆகியோருடன் ஆய்வு செய்தாா். இதற்கு நாகியம்பட்டி ஊா் பொதுமக்கள் கடும் எதிா்ப்பு தெரிவித்துள்ளனா்.
நாகியம்பட்டி ஊராட்சிப் பகுதியில் , அகதிகள் முகாமையொட்டி செல்லியம்மமன் கோயில் உள்ளது. இதனையொட்டி கல்லாங்குத்து என்ற அரசு புறம்போக்கு நிலப்பகுதி உள்ளது. இந்த இடத்தில் செல்லியம்மன் கோயில் திருவிழாவின்போது, குடி அழைத்தல் உள்ளிட்ட நிகழ்வுகள் நடைபெற்று வருகின்றன. இந்த நிலத்தை நாகியம்பட்டி ஊா் மக்களின் பொதுப் பயன்பாட்டுக்கு அளிக்க வேண்டும் என பொதுமக்கள் கேட்டுக்கொண்டனா்.
இதுகுறித்து நாகியம்பட்டி அனைத்து கோயில்களின் தா்மகா்த்தா முத்துசாமி கூறியதாவது:
இந்த நிலப்பகுதியை நாகியம்பட்டி ஊா் பொதுப்பயன்பாட்டிற்கு ஒதுக்க வேண்டும். அரசு உயா்நிலைப்பள்ளி, சேமிப்புக் கிடங்கு, கால்நடை மருத்துவமனை, குப்பைகள் தரம் பிரிக்கும் கொட்டகை போன்ற பயன்பாட்டிற்கு அளிக்க வேண்டும். இதுகுறித்து நாகியம்பட்டி ஊராட்சிக் கூட்டத்தில் கடந்த ஜூன் மாதம் தீா்மானம் நிறைவேற்றப்பட்டுள்ளது என்றாா்.
நாகியம்பட்டி முன்னாள் தலைவா் பாலு கூறியதாவது:
தம்மம்பட்டி மரச்சிற்பங்களுக்கான காட்சி மையத்துக்கு திருமண்கரடு மலைப்பகுதியிலோ, நாகியம்பட்டி ஊராட்சியின் வடகிழக்கு பகுதியிலோ உள்ள இடங்களை ஒதுக்கலாம். பிரதான சாலையோரமுள்ள இந்த இடத்தை, ஊா் பொதுமக்கள் பயன்பாட்டிற்குத்தான் விட வேண்டும் என்றாா்.
இதுகுறித்து நாகியம்பட்டி மக்கள் கூறியதாவது:
அதிகாரிகளிடம் நேரிலும், தபாலிலும் கேட்டபோதெல்லாம், அந்த இடம், மரச்சிற்ப பயன்பாட்டிற்கு விடப்படாது என்று தெரிவித்து வந்த நிலையில், அந்த நிலத்தை மரச்சிற்பங்கள் மையத்துக்கு அளிப்பதற்கு தமிழ்நாடு தொழில் வணிக இயக்குநா் ஆய்வு செய்துவிட்டுச் சென்றது அதிா்ச்சியளிக்கின்றது என்றனா்.
இதுகுறித்து கெங்கவல்லி வட்டாட்சியா் பாலகிருஷ்ணன் கூறியதாவது: தம்மம்பட்டி மரச்சிற்பக் காட்சி மையத்திற்கு திருமண்கரடு, நாகியம்பட்டி, மல்லியகரை உள்ளிட்ட மூன்று பகுதியில் இடங்கள் பாா்க்கப்பட்டுள்ளது. நாகியம்பட்டி மக்கள் விருப்பத்திற்கிணங்க நடவடிக்கை எடுக்கப்படும் என்றாா்.
