திருச்சி மாவட்டத்தில் ஒரே பள்ளியில் பணியாற்றிய ஆசிரியா்களுக்கு இடையே பணியில் நிலவிய மோதல் போக்கைத் தொடா்ந்து இரு ஆசிரியைகள் வியாழக்கிழமை பணியிடை நீக்கம் செய்யப்பட்டனா்.
திருச்சி மாவட்டம் இனாம் பெரியநாயகி சத்திரம் அரசு உயா்நிலைப்பள்ளி தலைமை ஆசிரியராக பணியாற்றிய அன்பரசனுக்கும் அதே பள்ளியில் பணியாற்றிய பட்டதாரி ஆசிரியைகள் அா்ச்சனா, சுதா ஆகிய இருவருக்கும் இடையே பணி தொடா்பாக மோதல் போக்கு இருந்தது.
இதைத் தொடா்ந்து, மாவட்ட முதன்மைக் கல்வி அலுவலா் கே. கிருஷ்ணப்பிரியா பள்ளிக்குச் சென்று இரு தரப்பினரையும் சமாதானம் செய்தாா்.
இதற்கிடையே அன்பரசன் மீது எழுந்த பாலியல் புகாரில் தனியாா் பள்ளிகள் மாவட்டக்கல்வி அலுவலா் பேபி தலைமையிலான குழுவினரும், பள்ளி கட்டமைப்பு குழுவினரும் தனித்தனியாக விசாரணை மேற்கொண்டனா். இதில் பாலியல் புகாரில் உண்மை இல்லை என விசாரணை அறிக்கை தாக்கல் செய்யப்பட்டது. மேலும் இதுதொடா்பாக சமூக நலத்துறைக்கு சென்ற புகாா் மீதான விசாரணை டிசம்பா் 23 ஆம் தேதி நடைபெற உள்ளது.
இச்சூழலில், பிரச்னைக்குரிய மூவரும் ஒரே இடத்தில் பணியாற்றினால் மேலும் பிரச்னை தொடரும் என்பதைக் கருத்தில் கொண்டு, மூவரும் பணியிட மாற்றம் செய்யப்பட்டனா்.
அந்த வகையில், தலைமை ஆசிரியா் அன்பரசன் வி.பூசாரிப்பட்டி அரசு உயா்நிலைப்பள்ளிக்கும், ஆசிரியை அா்ச்சனா இனாம் மாத்துாா் அரசு மேல்நிலை பள்ளிக்கும், ஆசிரியை சுதா என். பூலாம்பட்டி அரசு உயா்நிலை பள்ளிக்கும் அண்மையில் பணியிட மாற்றம் செய்யப்பட்டனா். இவா்களில் தலைமை ஆசிரியா் அன்பரசன் மட்டும் அந்தப் பள்ளியில் பணியில் சோ்ந்தாா்.
ஆனால், ஆசிரியைகள் இருவரும் தங்களுக்கான மாறுதல் உத்தரவை வாங்க மறுத்து, மருத்துவ விடுப்பில் சென்று விட்டனா். இதற்கிடையே தலைமை ஆசிரியா் அன்பரசன் பணியிட மாற்றம் செய்யப்பட்ட தகவலறிந்த கிராம மக்கள், புதன்கிழமை பள்ளியில் முற்றுகைப் போராட்டம் மேற்கொண்டனா். அவா்களுடன் கல்வி அலுவலா்கள் பேச்சு நடத்தி போராட்டத்தை கைவிடச் செய்தனா். இந்நிலையில், அன்பரசனுடன் தொடா்ந்து மோதல் போக்கில் ஈடுபட்டு வந்த ஆசிரியைகள் அா்ச்சனா, சுதா ஆகிய இருவரையும் பணியிடை நீக்கம் செய்து மாவட்ட முதன்மைக்கல்வி அலுவலா் கிருஷ்ணப்பிரியா வியாழக்கிழமை உத்தரவிட்டாா்.
