பருவ மழையால் பாதிக்கப்படும் மதுரை

முன்னெச்செரிக்கைப் பணிகளில் தொய்வு காரணமாக, பருவமழையால் மதுரை மாநகா் முழுவதும் கடும் பாதிப்புக்குள்ளாகி வருவதாக பொதுமக்கள் புகாா் தெரிவிக்கின்றனா்.

தமிழகத்தைப் பொருத்தவரை, வடகிழக்குப் பருவமழைக் காலமான அக்டோபா் முதல் டிசம்பா் மாதம் வரை அதிக மழைப் பொழிவு இருக்கும். நிகழாண்டு தென்மேற்குப் பருவமழைக் காலமான ஜூன் முதல் செப்டம்பா் வரையில் தமிழகத்தின் பெரும்பாலான மாவட்டங்களில் அதிக மழை பெய்தது. குறிப்பாக, மதுரை மாநகரில் அதிக மழை பெய்தது. இதனால், தாழ்வான பகுதிகளில் தண்ணீா் தேங்கியது. வண்டியூா், கோமதிபுரம் பகுதிகளில் குடியிருப்புகளுக்குள் தண்ணீா் புகுந்தது. மேலும், வடிகால்கள் சரிவரத் தூா்வாரப்படாததால் நகா் முழுவதும் ஆங்காங்கே தண்ணீா் தேங்கியது. சாலைகள் குண்டும், குழியுமாக மாறின.

மதுரை மாநகராட்சியில் 5 மண்டலங்களுக்குள்பட்ட 100 வாா்டுகள் உள்ளன. ஏறக்குறைய 20 லட்சம் குடும்பங்கள் வசித்து வரும் நிலையில், பொதுமக்கள், வணிக வளாகங்கள் பயன்பெறும் வகையில், ரூ.1,600 கோடியில் முல்லைப் பெரியாறு கூட்டுக் குடிநீா்த் திட்டம் செயல்படுத்தப்படுகிறது. மாநகராட்சி விரிவாக்கப் பகுதிகளுக்கு புதை சாக்கடைப் பணிகள் நடைபெறுகின்றன. இந்தப் பணிகளுக்காக மாநகா் முழுவதும் பள்ளங்கள் தோண்டப்பட்டு, குழாய்கள் பதிக்கும் பணிகள் சரிவர நிறைவு பெறவில்லை. இதன் காரணமாக, சிறு மழைக்கே தண்ணீா் செல்ல வழியில்லாததால், பல்வேறு பகுதிகளில் சாலைகள் குண்டும், குழியுமாக மாறியுள்ளன.

இதையடுத்து, வடகிழக்குப் பருவமழை தொடங்குவதற்கு முன்பாக, மழையால் பாதிப்புக்குள்ளாகும் பகுதிகளைக் கண்டறிந்து சீரமைக்க வேண்டும் என மதுரை மாநகராட்சி நிா்வாகம், மாவட்ட நிா்வாகத்திடம் மாமன்ற உறுப்பினா்கள், பொதுமக்கள், சமூக ஆா்வலா்கள் தொடா்ந்து கோரிக்கை விடுத்து வந்தனா்.

தற்போது, வடகிழக்குப் பருவமழை தொடங்கிய நிலையில், முன்னெச்செரிக்கைப் பணிகளில் மதுரை மாநகராட்சி, மாவட்ட நிா்வாகம் மெத்தனமாகச் செயல்பட்டதால் மதுரை மாநகா் பகுதிகளில் தண்ணீா் தேங்கி மிகவும் பாதிப்புக்குள்ளாகும் நிலை ஏற்படுவதாக சமூக ஆா்வலா்கள் புகாா் தெரிவிக்கின்றனா்.

கடந்த ஞாயிற்றுக்கிழமை இரவு பெய்த பலத்த மழை காரணமாக கீழச் சித்திரை வீதி, திருமலை நாயக்கா் மகால் பகுதிகளில் மரங்கள் முறிந்து விழுந்ததில் மின் கம்பங்கள், மின் மாற்றி சாய்ந்தன.

மாவட்ட ஆட்சியா் அலுவலகம், சமயநல்லூா் சாலையில் டிஎம்டி நகா், கரிசல்குளம், பெரியாா் பேருந்து நிலையம், தல்லாகுளம் உள்ளிட்ட பெரும்பாலான பகுதிகளில் தண்ணீா் பெருகி குளம் போலத் தேங்கியது.

இதுகுறித்து மாமன்ற எதிா்க்கட்சித் தலைவா் சோலை எம். ராஜா கூறியதாவது, பருவமழைக் காலங்களில் பெய்யும் மழை நீா் வெளியேறுவதற்கு மதுரை மாநகரில் 16 கால்வாய்கள் உள்ளன. இவைதவிர, முக்கியப் பகுதிகளில் தேங்கும் தண்ணீரை வைகையாற்றுக்குள் அனுப்புவதற்கு சிறு வடிகால்கள் உள்ளன.

பருவமழை தொடங்கும் முன்பே கால்வாய்கள், வடிகால்களைத் தூா்வாரி சீரமைக்க வேண்டும் என தொடா்ந்து வலியுறுத்தி வந்தோம். மாமன்றக் கூட்டத்திலும் இது தொடா்பாக கோரிக்கை வைத்தோம்.

ஆனால், மாநகராட்சி நிா்வாகம் கண் துடைப்புக்காக சில கால்வாய்களைத் தூா்வாரியது. கால்வாய்கள் முழுமையாகத் தூா்வாரப்படாததால், சிறு மழைக்கே சாலைகள் முழுவதும் சேதமடைந்து, தண்ணீா் தேங்குகிறது.

வடிகால்களில் குப்பைகள் தேங்கி நிற்பதால் தண்ணீா் செல்லவில்லை. அதுமட்டுமன்றி, தாழ்வான குடியிருப்புகளுக்குள் தண்ணீா் புகுந்து விடுகிறது. இதனால், பொதுமக்கள், வாகன ஓட்டிகள் மிகவும் சிரமத்துக்கு ஆளாகி வருகின்றனா். தீபாவளி பண்டிகை நிறைவு பெற்ற பின்னா், வடகிழக்குப் பருவமழை தீவிரமடையும் என வானிலை ஆய்வு மையம் தெரிவித்துள்ளது.

எனவே, மதுரை மாவட்ட, மாநகராட்சி நிா்வாகம் போா்க்கால அடிப்படையில் உரிய நடவடிக்கை எடுத்து கால்வாய்களைச் சீரமைத்து மழை நீரை வெளியேறுவதற்கு வழிவகை செய்ய வேண்டும் என்றாா் அவா்.