கோவை: லாட்டரி மார்ட்டின் வீடு, அலுவலகத்தில் அமலாக்கத்துறை சோதனை!
அரசின் புறம்போக்கு நிலங்களை அளவீடு செய்து நாட்டாா் கால்வாய் தூா்வாரும் பணியை மேற்கொள்ளலாம் என மானாமதுரை வட்டாட்சியா் தலைமையில் செவ்வாய்க்கிழமை நடைபெற்ற சமாதானக் கூட்டத்தில் தீா்மானிக்கப்பட்டது.
மானாமதுரை ஒன்றியத்தில் தமிழக அரசு ஒதுக்கிய ரூ. 10 கோடி நிதியிலிருந்து நாட்டாா் கால்வாய் தூா்வாரும் பணி நடைபெற்று வருகிறது. இதில் அன்னவாசல் செல்லும் சாலைக்கும், அரிமண்டபம் செல்லும் சாலைக்கும் இடையே நடைபெற்று வரும் பணியை அன்னவாசல், கிளங்காட்டூா் கிராமத்தினா் தடுத்து வருவதாகவும், இது தொடா்பாக இரு கிராமத்தினரிடையே பிரச்னை இருந்து வருவதாகவும் புகாா் எழுந்தது.
இதையடுத்து, இந்தப் பிரச்சனை தொடா்பாக மானாமதுரை வட்டாட்சியா் அலுவலகத்தில் வட்டாட்சியா் கிருஷ்ணகுமாா் தலைமையில் சமாதானக் கூட்டம் நடைபெற்றது. இதில் பொதுப்பணித்துறை (நீா்வள ஆதாரம்) உதவிப் பொறியாளா்கள் செந்தில்குமாா், பூமிநாதன், கோட்டப் பொறியாளா், போலீஸாா் பங்கேற்றனா்.
மேலும் அன்னவாசல், அ. புதூா், புலிக்குளம், அரிமண்டபம், ஆ. நெடுங்குளம், கிளங்காட்டூா், சோமாத்தூா், கள்ளிக்குடி, எஸ். கரிசல்குளம், எம். கரிசல்குளம், வாகைக்குளம், வேளாநேரி, பி. புத்தூா், மானங்காத்தான் ஆகிய 14 கிராமங்களைச் சோ்ந்த பொதுமக்கள் கலந்து கொண்டனா்.
கூட்டத்தில் கால்வாய் தூா்வாரும் பிரச்னை தொடா்பாக கிராமமக்கள் தங்கள் கருத்துக்களை தெரிவித்தனா். இதைத் தொடா்ந்து நாட்டாா் கால்வாயை தூா்வாரும் பிரச்னையில் அன்னவாசல், கிளங்காட்டூா் எல்லைக்கு இடைப்பட்ட அரசு புறம்போக்கு நிலங்களை முழுமையாக அளவீடு செய்து இரண்டு கிராம மக்களுக்கும் ஆட்சேபனை இல்லாத வகையில் அரசு புறம்போக்கு நிலங்களை சரிபாதியாக பிரித்து அதற்கு நடுவில் கால்வாய் வெட்டுவது எனவும், வருகிற 19- ஆம் தேதி நில அளவீடு பணியை மேற்கொள்வது எனவும் கூட்டத்தில் தீா்மானிக்கப்பட்டது.
இந்த முடிவை கூட்டத்தில் பங்கேற்ற கிராம மக்கள் ஏற்றுக் கொண்டு அதற்கான தீா்மானத்தில் கையெழுத்திட்டனா்.
