போடியில் செவ்வாய்க்கிழமை இரு சக்கர வாகனங்கள் நேருக்குநோ் மோதிக் கொண்ட விபத்தில் கல்லூரி மாணவா் உயிரிழந்தாா்.
போடி அருகேயுள்ள தருமத்துப்பட்டி கருப்பசாமி கோவில் தெருவைச் சோ்ந்த செல்வராஜ் மகன் வீரராஜ் (26). எலக்ட்ரீசியனான இவா், போடி பெருமாள் கோவில் தெருவைச் சோ்ந்த சங்கரபாண்டியன் மகன் ராஜமாணிக்கத்துடன் (28) இரு சக்கர வாகனத்தில் போடிக்கு சென்றாா்.
வஞ்சி ஓடைத்தெரு பகுதியில் வந்த போது, எதிரே வந்த மற்றொரு இரு சக்கர வாகனம் இவா்களது இரு சக்கர வாகனம் மீது மோதியது.
இந்த விபத்தில் வீரராஜ், ராஜமாணிக்கம், மற்றொரு இரு சக்கர வாகனத்தில் வந்த கல்லூரி மாணவா்களான போடி சுப்புராஜ் நகா் வெண்ணிமலை தோப்பைச் சோ்ந்த ஜெயராஜ் மகன் விமல்ராஜ் (20), போடி ஜக்கமநாயக்கன்பட்டி கருப்பசாமி கோயில் தெருவைச் சோ்ந்த மகேந்திரன் மகன் சூா்யபிரகாஷ் (20) ஆகியோா் பலத்த காயமடைந்தனா்.
போடி அரசு மருத்துவமனைக்கு கொண்டு செல்லும் வழியில் கல்லூரி மாணவா் விமல்ராஜ் உயிரிழந்தாா். மற்ற மூவரும் தேனி அரசு மருத்துவக் கல்லூரி மருத்துவமனைக்கு அனுமதிக்கப்பட்டனா்.
இதுகுறித்து போடி நகா் போலீஸாா் வழக்குப் பதிவு செய்து விசாரித்து வருகின்றனா்.
