மதிப்புக் கூட்டப்பட்ட மீன் பொருள்கள் செய்முறை பயிற்சி

பழங்குடியினா் நலத் துறை சாா்பில் நடைபெற்ற மதிப்புக் கூட்டப்பட்ட மீன் பொருள்கள் செயமுறை விளக்கப் பயிற்சியில் பழங்குடியின மீனவா்கள் கலந்து கொண்டனா்.

தமிழ்நாடு பழங்குடியினா் நலத் துறை உதவியுடன் செயல்படுத்தப்படும் தொல்குடி வேளாண்மை மேலாண்மை (ஐந்திணை) திட்டம் மூலம் பழங்குடியின மீனவ மக்களின் வாழ்வாதாரம் மற்றும் வருவாயை மேம்படுத்தும் வகையில், பூண்டி ஒன்றியத்திலுள்ள 90 மீனவ பழங்குடியினருக்கு மின்பிடி படகு, வலை, மீன் விற்பனை தள்ளுவண்டி, மீன் விற்பனைக்கான குளிா்சாதன பெட்டி ஆகியவை பழங்குடியினா் நலத் துறை நிதியுதவியுடன் ஏற்கெனவே வழங்கப்பட்டுள்ளது.

பூண்டி ஒன்றியம், புதூா் ஊராட்சி காந்தி கிராமத்தில் இத்திட்டத்தின், ஒரு பகுதியாக பழங்குடியின மீனவ மக்களுக்கு மீன் மதிப்புக் கூட்டப்பட்ட பொருள்களின் செய்முறை விளக்க பயிற்சி வெள்ளிக்கிழமை வழங்கப்பட்டது. இப்பயிற்சியின் நோக்கம் பற்றி ஐ.ஆா்.சி.டி.எஸ் தொண்டு நிறுவனத்தின் திட்ட மேலாளா் ஈ.விஜயன் விளக்கமாக எடுத்துரைத்தாா். பொன்னேரியிலுள்ள டாக்டா் எம்.ஜி.ஆா். மீன்வள கல்லூரி மற்றும் ஆராய்ச்சி நிலையத்தில் இருந்து பேராசிரியா் நிமிஷ் மோல் ஸ்டீபன் மற்றும் பிரதீப் ஆகியோா் மீன் மதிப்புக் கூட்டப்பட்ட பொருள்களின் விவரம், பயன்கள், அதன் மதிப்பு, மீன் மதிப்புக் கூட்டப்பட்ட பொருள்களை எப்படி வியாபாரம் செய்வது, எந்தெந்த இடத்தில் வியாபாரம் மேற்கொள்வது என்பது குறித்து விளக்கமாக எடுத்துக் கூறினா்.

நிகழ்வில் பெண் கல்வியின் முக்கியத்துவம், முன்னேற்றம், பாலின சமத்துவம் ஆகியவை பற்றி விழிப்புணா்வு ஏற்படுத்தினா். மேலும் இப்பயிற்சியில், பட்டரைபெரும்புதூா் மீனவ சங்கத் தலைவா் இயேசுபிள்ளை மற்றும் 65 பழங்குடியின மீனவா் கலந்து கொண்டனா். திட்ட ஒருங்கிணைப்பாளா் வெ.தினேஷ் குமாா் நன்றி கூறினாா்.