மதுரையில் கொலை; தூத்துக்குடி தேரிக்காட்டில் உடல் புதைப்பு... ஊரடங்கில் நடந்த பகீர் சம்பவம்..!

மதுரை மாவட்டம், வண்டியூரைச் சேர்ந்தவர் ரவீந்திரன். இவர், மதுரையில் வேல் அறக்கட்டளை என்ற பெயரில் மது போதை ஒழிப்பு மையம் நடத்தி வந்தார். இங்கு மதுரை, கே.புதூரைச் சேர்ந்த துளசிராமன் வேலை பார்த்து வந்துள்ளார். கடந்த 2016-ம் ஆண்டு துளசி ராமன் தனியாக மதுபோதை ஒழிப்பு மையம் நடத்தப் போவதாகக் கூறியுள்ளார்.  இதனால் ரவீந்திரனுக்கும் துளசிராமனுக்கும் இடையே மோதல் ஏற்பட்டுள்ளது.

இதில் ரவீந்திரன் துளசிராமனை தாக்க முயன்றுள்ளார். அப்போது துளசிராமனின் மகன் சிந்துராஜ் மதுபோதை ஒழிப்பு மையத்திற்கு சென்று ரவீந்திரன் மற்றும் ஊழியர்கள் சிலரை தாக்கிவிட்டு தன் தந்தையை அழைத்து வந்துவிட்டாராம்.

இந்த நிலையில், சிந்துராஜ், சில ஆண்டுகளுக்கு முன்பு மதுவுக்கு அடிமையானார். அவரது மனைவி பானுப்பிரியா, வேல் அறக்கட்டளையின் போதை மது ஒழிப்பு மையத்தை தொடர்பு கொண்டு தனது கணவரை போதையில் இருந்து மீட்க வேண்டுமென கூறியுள்ளார். அங்கிருந்த பணியாளர்கள், சிந்துராஜை மையத்திற்கு அழைத்துச் செல்ல வந்துள்ளனர்.  அப்போது மதுபோதையில் மயங்கி கிடந்த சிந்துராஜைப் பார்த்த பணியாளர்கள் ரவீந்திரன், பால்பாண்டி, வசந்த் ஆகியோர் தங்களை மையத்திற்கு அழைத்துச் சென்றுள்ளனர். அங்கு சிந்துராஜ் மூன்று பணியாளர்களையும் தாக்கியுள்ளார். இதில்  ஆத்திரமடைந்த பணியாளர்கள், சிந்துராஜை கொடூரமாகத் தாக்கியுள்ளனர்.

அதன் பிறகு போதை மறுவாழ்வு மையத்தின் உரிமையாளர் ரவீந்திரனுடன் பானுப்பிரியாவிற்கு தொடர்பு ஏற்பட்டுள்ளது.

இந்த நிலையில், கடந்த 2022-ம் ஆண்டு செப்டம்பர் மாதம் சிந்துராஜின் தந்தை துளசிராமன், போதை மறுவாழ்வு மையத்திற்கு வந்து மகன் குறித்து கேட்டுள்ளார்.

சரியான பதில் கூறாததால் சந்தேகமடைந்த துளசிராமன் மதுரை காவல் ஆணையர் அலுவலகத்தில் புகார் அளித்தார். போலீஸாரின் விசாரணை திருப்தி அடையாததால், உயர்நீதிமன்ற மதுரைக்கிளையில் கடந்த 2023-ல் ஆட்கொணர்வு மனு தாக்கல் செய்தார். தொடர்ந்து போதை ஒழிப்பு மையத்தினர் மற்றும் சிந்துராஜின் மனைவி பானுப்பிரியா ஆகியோரிடம் விசாரணை மேற்கொண்டனர்.

விசாரணையில் சிந்துராஜை அவரது மனைவி பானுப்பிரியா, போதை ஒழிப்பு மையத்தின் உரிமையாளர் ரவீந்திரன் மற்றும் அவரது நண்பர்கள் சிந்துராஜை கொடூரமாகத் தாக்கியதும் அதில் அவர் உயிரிழந்ததும் தெரிய வந்தது. பின்னர், சிந்துராஜின் உடலை மரம் அறுக்கும் மிஷின் மூலம் துண்டு துண்டாக வெட்டி சாக்குப் பையில் போட்டு காரில் தூத்துக்குடி மாவட்டம் திருச்செந்தூருக்கு கொண்டு வந்துள்ளனர்.

அங்கு தனியார் விடுதியில் தங்கியிருந்த அவர்கள், ரவீந்திரனின் நண்பரான திருச்செந்தூர் அமலிநகரைச் சேர்ந்த கண்ணன் என்ற பிச்சைக் கண்ணன் என்பவரிடம் உதவி கேட்டுள்ளனர். இதனையடுத்து ரவீந்திரன், கண்ணன், பால்பாண்டி, வசந்த் ஆகியோர் குதிரைமொழி தேரிப்பகுதியில் குழி தோண்டி புதைத்துவிட்டு வழக்கம்போல் தங்களின் பணிகளில் ஈடுபட்டனர்.

கண்ணன், ரவீந்திரன் ஆகியோர்  மீது மதுரை தெப்பக்குளம் காவல் நிலையத்தில் உள்ள வழக்கு தொடர்பாக மதுரை மத்திய சிறையில் ஆயுள் தண்டனை கைதியாக உள்ளதும்  தெரிய வந்தது. இருவரையும் காவலில் எடுத்து விசாரித்தபோது உண்மையை ஒப்புக் கொண்டனர். இதனையடுத்து, அவர்கள் இருவரையும் போலீஸார் திருச்செந்தூருக்கு அழைத்து வந்தனர். திருச்செந்தூர் அருகிலுள்ள குதிரைமொழி தேரிப்பகுதியில் சிந்துராஜை புதைத்த இடத்தை அடையாளம் காட்டினர்.

ஜே.சி.பி இயந்திரம் மூலம் தோண்டப்பட்டதில் எலும்புகள், மண்டை ஓடு என உடல் பாகங்கள் தனித்தனியாக கிடைத்தன. இதனை சேகரித்த போலீஸார் மதுரை மற்றும் சென்னையில் உள்ள ஆய்வகத்திற்கு அனுப்ப முடிவு செய்துள்ளனர்.  ”கொரோனா காலகட்டத்தில் ஊரடங்கு அமலில் இருந்த போது போக்குவரத்து தடை செய்யப்பட்டிருந்தது. ஆனால், அப்போது போலீஸாரின் கடுமையான பாதுகாப்பினையும் மீறி உடலை எப்படி திருச்செந்தூருக்கு கொண்டு வந்தனர் என்பது மர்மமாக உள்ளது. கொலை நடந்தது மதுரையில். ஆனால் உடலை ஏன் திருச்செந்தூர் பகுதிக்கு கொண்டு வந்தனர் என்பது குறித்தும் விசாரணை நடத்தி வருகிறோம்.” என்றனர் போலீஸார்.