ரயில் சேவையில் மாற்றம்! திருச்செந்தூர் ரயில் விழுப்புரத்தில் இருந்து புறப்படும்!!

விழுப்புரத்தில் பெய்த கனமழையால் அந்த வழித்தடத்தில் செல்லும் ரயில் சேவைகளில் மாற்றங்கள் செய்யப்பட்டுள்ளதாக தெற்கு ரயில்வே அறிவித்துள்ளது.

வங்கக்கடலில் உருவான ஃபென்ஜால் புயல் சனிக்கிழமை நள்ளிரவு கரையைக் கடந்தபோது, விழுப்புரம் மாவட்டம் முழுவதும் மழை கொட்டித் தீர்த்தது.

இதன் காரணமாக விழுப்புரம் நகரத்தின் அனைத்துப் பகுதிகளிலும் மழைநீர் தேங்கியதால் மக்களின் இயல்பு வாழ்க்கை அங்கு பாதிக்கப்பட்டுள்ளது.

விக்கிரவாண்டி - முண்டியம்பாக்கம் இடையே உள்ள ரயில்வே பாலம் மற்றும் திருக்கோவிலூர் - தண்டரை இடையே உள்ள ரயில்வே பாலத்தில் தண்ணீர் தேங்கியுள்ளதால் அங்கு ரயில் சேவை நிறுத்தப்பட்டுள்ளது.

இதனால் பின்வரும் ரயில் சேவையில் மாற்றம் செய்யப்பட்டுள்ளதாக தெற்கு ரயில்வே அறிவித்துள்ளது.

சென்னை எழும்பூர் - திருச்செந்தூர் அதிவிரைவு ரயில்(20605) மாலை 4.10 மணிக்கு சென்னை எழும்பூரில் இருந்து கிளம்பவிருந்த நிலையில் இன்று விழுப்புரத்தில் இருந்து புறப்படும். சென்னை எழும்பூர் - விழுப்புரம் இடையே பகுதியாக ரயில் சேவை ரத்து செய்யப்பட்டுள்ளது.

மேலும், ரத்து செய்வதாக அறிவிக்கப்பட்ட சென்னை எழும்பூர் - மன்னார்குடி ரயில்(16179) சென்னை எழும்பூரில் இருந்து இன்று இரவு 10.55 மணிக்குப் பதிலாக 11.55 மணிக்குப் புறப்படும்.

வழித்தடம் மாற்றம்:

பிர்சாபூர் - ராமேஸ்வரம் அதிவிரைவு ரயில்(20498) வழித்தடம் மாற்றப்பட்டுள்ளது. இது சென்னை எழும்பூர், சென்னை கடற்கரை, அரக்கோணம், காட்பாடி, சேலம், கரூர், திருச்சி வழியாகச் செல்லும்.

தாமதமாக புறப்படும் ரயில்கள்:

சென்னை எழும்பூர் - கொல்லம் அதிவிரைவு ரயில்(16101) எழும்பூரில் இருந்து இன்று மாலை 5 மணிக்குப் பதிலாக 6 மணிக்குப் புறப்படும்.

சென்னை எழும்பூர் - ராமேஸ்வரம் அதிவிரைவு ரயில்(22661) எழும்பூரில் இருந்து இன்று மாலை 5.45 மணிக்குப் பதிலாக 6.45 மணிக்குப் புறப்படும்.

சென்னை எழும்பூர் - கன்னியாகுமரி ரயில் எழும்பூரில் இருந்து இன்று மாலை 5.20 மணிக்குப் பதிலாக 6.20 மணிக்குப் புறப்படும்.