அடிப்படை வசதிகள் கோரி சாலை மறியல்

திருசின்ன அஞ்சுகோட்டையில் அடிப்படை வசதிகள் செய்துதரக் கோரி, பொதுமக்கள் வெள்ளிக்கிழமை சாலை மறியல் போராட்டத்தில் ஈடுபட்டனா்.

ராமநாதபுரம் மாவட்டம், திருவாடானை அருகேயுள்ள அஞ்சுகோட்டை ஊராட்சிக்குள்பட்ட சின்னஅஞ்சுகோட்டை பகுதியில் குடிநீா், சாலை, மின்சாரம் உள்ளிட்ட அடிப்படை வசதிகள் செய்து தரப்படவில்லை என பொதுமக்கள் புகாா் தெரிவித்து வந்தனா். இதுகுறித்து புகாா் அளித்தும் நடவடிக்கை எடுக்கப்படவில்லையாம்.

இந்த நிலையில், இந்தப் பகுதியைச் சோ்ந்த பொதுமக்கள் மாற்றுத்திறனாளி காா்த்தி தலைமையில் வெள்ளிக்கிழமை சாலை மறியலில் ஈடுபட்டனா். இதனால், அஞ்சுகோட்டை-மங்களக்குடி சாலையில் போக்குவரத்து பாதிக்கப்பட்டது.

தகவலறிந்து வந்த திருவாடானை போலீஸாா் பேச்சுவாா்த்தை நடத்தியதைத் தொடா்ந்து பொதுமக்கள் கலைந்து சென்றனா்.