புதுதில்லி: அதானி வில்மர் நிறுவனத்தின் நிகர லாபம், 2024 - 25 ஆம் நிதியாண்டில், இரண்டு மடங்கு அதிகரித்து, ரூ.410.93 கோடி ஆக உள்ளது.
கடந்த ஆண்டு இதே காலாண்டில் நிறுவனத்தின் நிகர லாபம் ரூ.200.89 கோடியாக இருந்தது. நிறுவனத்தின் மொத்த வருமானம் ரூ.12,887.21 கோடியிலிருந்து அதிகரித்து ரூ.16,926 கோடியானது.
சமையல் எண்ணெய் பிரிவின் வருவாய் ரூ.9,710.82 கோடியிலிருந்து அதிகரித்து ரூ.13,386.71 கோடியானது. அதே வேளையில் உணவு மற்றும் எஃப்எம்சிஜி பிரிவின் வருவாய் ரூ.1,273 கோடியிலிருந்து ரூ.1,558 கோடியாகவும், தொழில்துறை அத்தியாவசிய வருவாய் ரூ.1,844.12 கோடியிலிருந்து ரூ.1,914.59 கோடியாகவும், செலவினம் ரூ.12,606.26 கோடியிலிருந்து அதிகரித்து ரூ.16,379.76 கோடியானது.
இது குறித்து அதானி வில்மர் நிர்வாக இயக்குநர் மற்றும் தலைமை நிர்வாக அதிகாரி அங்ஷு மாலிக் கூறியதாவது:
நிறுவனம் கடந்த ஐந்து காலாண்டுகளாக வலுவான லாபத்தை பதிவு செய்து வருகிறது. அதே வேளையில் வட்டி, வரி, தேய்மானம் மற்றும் கடனளிப்புக்கு முன் வருவாய் ரூ.792 கோடியாகவும் மற்றும் வரிக்கு பிந்தைய லாபம் ரூ 411 கோடியாக உள்ளது.
கடந்த பன்னிரண்டு மாதங்களாக இ-காமர்ஸ் வருவாய் ஆண்டுக்கு ஆண்டு 41 சதவிகிதம் வளர்ச்சியடைந்துள்ளது. மூன்றாவது காலாண்டில் பிராண்டட் தயாரிப்புகளில் ஆண்டுக்கு ஆண்டு 15 சதவிகிதம் வளர்ச்சியுடன், தென்னகத்தில் நிறுவனம் வலுவான அடியெடுத்து வைத்துள்ளது.
நிறுவனத்தின் பங்குகள் பிஎஸ்இ-யில் ரூ.5.06 சதவிகிதம் உயர்ந்து ரூ.264.60 ஆக வர்த்தகம் செய்யப்பட்டது.
இதையும் படிக்க: கனரா வங்கியின் லாபம் 12% உயர்வு!
