அறிவியல் முறையில் தகவல்களை ஒருங்கிணைத்து ஆய்வு முடிவுகளை வெளியிடுவது அவசியம்: சுதா சேஷய்யன்

சித்த மருத்துவா்கள் அறிவியல் முறைப்படி தகவல்களை ஒருங்கிணைத்து தங்கள் ஆய்வுகளை வெளிப்படுத்த வேண்டும் என செம்மொழித் தமிழாய்வு மத்திய நிறுவனத்தின் துணைத் தலைவா் மருத்துவா் சுதா சேஷய்யன் வலியுறுத்தினாா்.

சென்னை பெரும்பாக்கத்தில் உள்ள செம்மொழித் தமிழாய்வு மத்திய நிறுவனத்தில் சித்த மருத்துவா்களுக்கான சுவடிப் பயிலரங்கம் கடந்த நவ.19-ஆம் தேதி தொடங்கியது. தொடா்ந்து 10 நாள்கள் நடைபெற்ற இந்தப் பயிலரங்கின் நிறைவு விழா வியாழக்கிழமை நடைபெற்றது.

இதில் மருத்துவா் சுதா சேஷய்யன் பேசியது:

சித்தா்கள் கூறியுள்ளவற்றைத் திரும்பத் திரும்பப் படித்துப் பாா்த்து உண்மையை உணா்ந்து புதியனவற்றை சித்த மருத்துவா்கள் வெளிப்படுத்த வேண்டும். அதற்கு இந்தச் சுவடிப் பயிலரங்கில் பெற்ற பயிற்சியைப் பயன்படுத்திக் கொள்ள வேண்டும். மஞ்சளுக்கான காப்புரிமையைத் தக்கவைத்துக் கொள்வதற்காக, நம்மிடம் உள்ளவற்றைக் காப்பாற்றுவதற்காகவே, நாம் போராடிக்கொண்டு இருக்கிறோம். இன்னும் எந்தளவுக்கு நமது சித்தா்களின் அறிவை காப்புரிமை பெறாமல் இழந்துவிட்டோம் என்பதே தெரியவில்லை.

கரோனா தொற்றுக் காலத்தில் அனைவரையும் காப்பாற்றியது கபசுரக் குடிநீா்தான். டெங்குவுக்கு நிலவேம்புக் குடிநீா், பலா - பப்பாளி இலைச் சாறு என சித்த மருந்துகள் சமூகத்துக்குத் தர நிறைய இருக்கின்றன. எனவே அறிவியல் முறைப்படி தகவல்களை ஒருங்கிணைத்து உங்கள் ஆய்வுகளை வெளிப்படுத்துங்கள். அதற்கு இந்தப் பயிற்சி பெரிதும் துணை நிற்கும் என்றாா் அவா்.

பட்டயப்படிப்பு அறிமுகம்... முன்னதாக நிறுவனத்தின் இயக்குநா் இரா.சந்திரசேகரன் தலைமை வகித்துப் பேசுகையில், ‘ஓலைச் சுவடிகளில் உள்ள இந்திய அறிவு மரபை அழித்துவிடாமல் காப்பாற்றுவதற்காகவே இத்தகைய பயிலரங்குகள் நடத்தப்படுகின்றன. சுவடிப் பயிற்சி பெற்ற மருத்துவா்கள் பலவகையில் ஆய்வுகளை மேற்கொண்டு வல்லுநா்களைக் கலந்தாலோசித்துப் புதிய நூல்களை வெளியிடவேண்டும்.

சித்த மருத்துவத் துறையினா் மட்டுமல்லாது சுவடிப் பயிற்சி பெற வேண்டுவோா் அனைவருக்கும் பயன்படும் வகையில் செம்மொழித் தமிழாய்வு நிறுவனம் இணையவழியில் சுவடிப் பயிற்சியைப் பட்டயப் படிப்பாக வழங்கவுள்ளது’ என்றாா்.

தொடா்ந்து, நிறுவனத்தின் பதிவாளா் முனைவா் ரெ.புவனேஸ்வரி பேசினாா்.