ஆம்பூா் பகுதி கோயில்களில் அஷ்டமி திதியை முன்னிட்டு, பைரவாஷ்டமி விழா சனிக்கிழமை நடைபெற்றது.
ஆம்பூா் அருள்மிகு சமயவல்லி தாயாா் உடனுறை சுயம்பு ஸ்ரீ நாகநாத சுவாமி கோயிலில் பைரவாஷ்டமியை முன்னிட்டு, கோ பூஜை, கணபதி ஹோமம், ஸ்ரீ சத்ரு சம்ஹார ஹோமம், கலசாபிஷேகம் நடைபெற்றது. ஸ்ரீ அஸிதாங்க பைரவா் மற்றும் ஸ்ரீ கால பைரவருக்கு வெள்ளிக் கவச அலங்காரம் செய்யப்பட்டிருந்தது. ஆம்பூா் நகா்மன்ற துணைத் தலைவா் எம்.ஆா்.ஆறுமுகம், அறங்காவலா் குழுத் தலைவா் எம்.கைலாஷ்குமாா் உள்ளிட்டோா் கலந்து கொண்டனா்.
ஆம்பூா் அருகே மிட்டாளம் ஊராட்சி பைரப்பல்லி கிராமத்தில் ஸ்ரீ மஹா கால பைரவா் கோயிலில் கோ பூஜை, விக்னேஸ்வர பூஜை, கணபதி ஹோமத்துடன் விழா தொடங்கியது. மூலவருக்கு சிறப்பு அபிஷேகம், சந்தனக் காப்பு அலங்காரம், உற்சவா் திருவீதியுலா, அன்னதானம் ஆகிய நிகழ்ச்சிகள் நடைபெற்றன.
விண்ணமங்கலம் ஊராட்சி கம்மியம்பட்டு புதூா் கிராமத்தில் ஸ்ரீ மஹா கால பைரவா் கோயிலில் ஹோமம், சிறப்பு அபிஷேகம், அலங்காரம் நடைபெற்றது. திரளான பக்தா்கள் கலந்து கொண்டு சாமி தரிசனம் செய்தனா்.
மாதனூா் ஆத்மநாத ஈஸ்வரா் கோயிலில் கால பைரவருக்கு சிறப்பு அபிஷேக, ஆராதனைகள் நடைபெற்றன.
