டேங்கா் லாரிகளில் கடத்தப்பட்ட பயோ டீசல் பறிமுதல்: 4 போ் கைது

மதுரையில் டேங்கா் லாரியில் சட்டவிரோதமாக கடத்தப்பட்ட ரூ.36 லட்சம் மதிப்பிலான பயோ டீசலை, உணவுப்பொருள் கடத்தல் தடுப்புப் பிரிவு போலீஸாா் சனிக்கிழமை பறிமுதல் செய்து, 4 பேரைக் கைது செய்தனா்.

திருச்சி-மதுரை நான்குவழிச் சாலை வழியாக டேங்கா் லாரி மூலம் சட்டவிரோதமாக பயோ டீசல் கடத்தப்படுவதாக மதுரை உணவுப் பொருள் கடத்தல் தடுப்புப் பிரிவு போலீஸாருக்கு சனிக்கிழமை தகவல் கிடைத்தது.

இதையடுத்து உணவுப் பொருள் கடத்தல் தடுப்புப் பிரிவு துணை கண்காணிப்பாளா் செந்தில் இளந்திரையன், ஆய்வாளா் வனிதா, உதவி ஆய்வாளா் சிவபிரகாசம் மற்றும் போலீஸாா் திருச்சி-மதுரை நான்குவழிச் சாலையில் சாளக்கிப்பட்டி-சமத்துவபுரம் பகுதியில் தீவிர வாகனச் சோதனையில் ஈடுபட்டனா்.

அப்போது, அந்த வழியாக வந்த 2 டேங்கா் லாரிகளை சோதனையிட்டபோது அவற்றில் சட்ட விரோதமாக ரூ.36 லட்சம் மதிப்புள்ள பயோ டீசல் கடத்தி வந்தது தெரிய வந்தது.

இதையடுத்து லாரிகளில் கடத்தி வந்த 38, 400 லிட்டா் பயோ டீசலை பறிமுதல் செய்து, கோவையை சோ்ந்த நந்தகுமாா், மேலூரைச் சோ்ந்த பாஸ்கா், சேக்தாவூத் முகமது இப்ராகிம், சிவகங்கையை சோ்ந்த வினோத்குமாா் ஆகிய நால்வரையும் கைது செய்தனா்.