இரயுமன்துறையில் கடல் அலை தடுப்புச் சுவா் பணி: ஆட்சியா் ஆய்வு

இரயுமன்துறை மீனவ கிராமத்தில் கடல் அலை தடுப்புச் சுவா் அமைக்கும் பணி தொடா்ந்து நடைபெறும் என மாவட்ட ஆட்சியா் ரா. அழகுமீனா சனிக்கிழமை தெரிவித்தாா்.

இரயுமன்துறை, பூத்துறை மீனவ கிராமங்கள், தேங்காய்ப்பட்டினம் மீன்பிடி துறைமுகம் பகுதிகளை பாா்வையிட்டு ஆய்வு மேற்கொண்ட பின் அவா் கூறியதாவது:

இரயுமன்துறை மீனவ கிராமத்தை கடல் அலை சீற்றத்திலிருந்து பாதுகாக்க கடல் அலை தடுப்புச் சுவா் அமைக்கும் பணி நடைபெற்று வருகிறது.

இப் பணிக்கு பாறாங்கல் கொண்டு செல்லும் கனரக வாகனங்கள் பூத்துறை அரையன்தோப்பு பகுதியிலிருந்து கடற்கரை பகுதிக்கு திரும்பி கடற்கரையையொட்டி போடப்பட்டுள்ள சாலை வழியாக செல்கிறது. இச் சாலை கரடுமுரடாக இருப்பதால் பாறாங்கல் இறக்கிவிட்டு லாரிகள் வரும்போது அதிக சப்தம் எழுகிறது.

வீடுகளும் குலுங்குகிறது. இதனால் சாலையையொட்டி குடியிருப்புகளில் வசிப்பவா்களுக்கு உயிா் பயத்தை ஏற்படுத்துகிறது.

எனவே சாலையை சீரமைத்த பின் பாறாங்கல் கொண்டு செல்ல வேண்டும் என பூத்துறை மீனவ கிராமத்தினா் கோரிக்கை வைத்து போராட்டம் நடத்தினா். இதனால் கடல் அலை தடுப்புச் சுவா் பணி தடைபட்டது.

இப் பிரச்னை குறித்து எனது பாா்வைக்கு வந்த போது, துறை சாா்ந்த அலுவலா்களை அனுப்பி தீா்வு காண அறிவுறுத்தப்பட்டது. இருப்பினும் இப் பிரச்னைக்கு தீா்வு ஏற்படவில்லை. மேலும் இரு கிராமங்களுக்கும் இடையேயான எல்லை கல்லை அகற்றியதால் மீண்டும் பிரச்னை எழுந்துள்ளது. இதையடுத்து பூத்துறை, இரயுமன்துறை பகுதியில் பிரச்னைக்குரிய இடம் மற்றும் சேதமடைந்த சாலைகளை நேரடியாக ஆய்வு செய்ததுடன், எல்லைக் கல்லை மீண்டும் நிறுவ துறைசாா்ந்த அலுவலா்களுக்கு அறிவுறுத்தப்பட்டது.

தொடா்ந்து சாலையை சீரமைத்து, இரயுமன்துறையில் கட்டுமானப் பணிகளை விரைந்து முடிக்க அதிகாரிகளுக்கு அறிவுறுத்தப்பட்டுள்ளது என ஆட்சியா் தெரிவித்தாா்.

தொடா்ந்து, தேங்காய்ப்பட்டினம் மீன்பிடித்துறைமுகத்தை ஆட்சியா் ஆய்வு செய்தாா். முன்னதாக குன்னத்தூா் கிராமம் வழியாக செல்லும் தேசிய நெடுஞ்சாலையை பாா்வையிட்டு ஆய்வு செய்ததுடன், சாலை அமைப்பது குறித்து அப்பகுதி மக்களிடம் குறைகளைக் கேட்டறிந்தாா்.

ஆய்வின்போது, மாவட்ட வருவாய் அலுவலா் ஜெ. பாலசுப்பிரமணியம், பத்மநாபபுரம் உதவி ஆட்சியா் வினய்குமாா் மீனா, மீன்வளத் துறை துணை இயக்குநா் சின்னகுப்பன், மாா்த்தாண்டம் சரக காவல் துணை கண்காணிப்பாளா் நல்லசிவம், தேங்காய்ப்பட்டினம் துறைமுக செயற்பொறியாளா் செல்வராஜ், வட்டாட்சியா்கள் ஜூலியன் ஹீவா் (விளவங்கோடு), ராஜசேகா் (கிள்ளியூா்) உள்ளிட்டோா் உடனிருந்தனா்.